Grupu Koli planeia transforma foho Caicoli ba fatin agroturizmu
DILI, 19 dezembru 2022 (TATOLI)—Xefe grupu Koli, Cesaltino Varelo, hateten, sira-nia parte planeia ona atu transforma foho Caicoli ba fatin agroturizmu.
“Ami iha mehi atu transforma foho Caicoli sai hanesan agroturizmu. Espera ami bele atrai turista hosi lokál no rejionál, iha futuru ami bele hatudu sistema agrofloresta ba turista sira,” Cesaltino hateten liuhosi nota ne’ebé Agência Tatoli asesu, segunda ne’e.
Tuir Xefe grupu ne’e, inisiativa ne’e mosu tanba hetan esperiénsia no matenek hosi projetu Ai ba Futuru.
“Maski ha’u-nia eskola primária grau 4 de’it, maibé matenek ne’ebé ha’u hetan hosi Ai ba Futuru bele halo mudansa boot ba hau-nia moris ho badinas no esforsu tomak ha’u bele lidera hau-nia grupu Koli hodi hadi’a ami-nia moris, ba uluk ha’u laiha buat ida maibé agora ha’u bele halo uma, sosa motor, selu labarik nia eskola no sustenta família nia moris,” nia akresenta.
Notísia relevante: Dalan ba Soberania Ai-han iha Timor-Leste
Aleinde ne’e, grupu ne’e nota mós katak sistema agrofloresta importante tebes ba Timor-Leste tanba bele ajuda agrikultór sira iha área rurál bele kuda ai-horis oin-oin iha to’os ida, nune’e bele diversifika produsaun ai-han no ai horis, iha tempu ne’ebé hanesan bele aumenta rendimentu uma-kain nian.
“Ita-nia agrikultór sira prátika nanis ona sistema agrofloresta maibé durante tinan-lima projetu Ai ba Futuru hanorin agrikultór sira no habelar sistema agrofloresta iha munisíplu sira hanesan Baucau, Lautém, Manatuto no Viqueque. Ezemplu ida maka atividade reflorestasaun iha Foho Caicoli ho aprosimasaun agrofloresta ne’ebé lokaliza iha aldeia Kabulai de cima, suku Uallaha, postu administrativu Venilale, munisípiu Baucau,” nia tenik.
Nune’e mós, Cesaltino Varelo fahe esperiénsia kona-ba oinsá nia ho nia grupu halo esforsu hamutuk ho apoiu hosi Ai ba Futuru transforma ona foho Caicoli hosi rai mamuk no agora haree matak no furak tebes.
Nia deside atu implementa projetu Ai ba Futuru iha tinan 2019, hamutuk ho uma-kain 52 envolve iha grupu ne’e no sira kuda ai-horis iha ektare 38, espesie oioin hanesan ai-kakeu, mahoni, ai-saria, avokadu, sabraka, goiaba, rambutan, ai-nanas no seluk tan. Molok implementa projetu, membru hosi grupu ne’e partisipa iha formasaun kona-ba agrofloresta.
Grupu Koli mós kada pesoál iha to’os rasik no kuda ai-horis hanesan batar, ai-teka, ai-farina, ai-dila, hudi, ai-nanas, lis, modo no ai-horis sira seluk.
Nune’e, Cesaltino Varelo reprezenta nia grupu hato’o agradese ba programa Ai ba Futuru tanba nia no ekipa bele hetan matenek hodi aplika ba servisu.
Jornalista : Arminda Fonseca
Editora : Julia Chatarina
