DILI, 20 dezembru 2022 (TATOLI)—Autoridade Inspesaun no Fiskalizasaun Atividade Ekonómika, Sanitária no Alimentár, Institutu Públiku (AIFAESA, I.P), tersa ne’e, halo detruisaun produtu sira ne’ebé liu prazu inklui tabaku ilísitu.
Inspetór Jerál AIFAESA, I.P, Ernesto Monteiro, hateten, sasán ne’ebé ohin halo destruisaun bazeia ba rezultadu servisu inspesaun ba estabelesimentu sira.
“Produtu sira ne’ebé ohin ami halo destruisaun maihosi hahán, bebida inklui tabaku ilísitu ne’ebé lei bandu. Ita halo inspesaun durante tinan-ida ba iha estabelesimentu sira iha kapitál Dili hamutuk 4.053, ne’ebé entre estabelesimentu hirak ne’e barak mak di’ak tanba la viola regra sira maibé estabelesimentu 227 komete infrasaun, balun prosesu ona no balun seidauk hotu,” Inspetór Jerál informa iha lixeiru Tibar.
Notísia relevante: AIFAESA identifika estabelesimentu komersiál 39 fa’an tabaku ilegál
Hosi estabelesimentu ne’ebé komete infrasaun durante tinan-ida nia laran selu koima hamutuk $101.000, enkuantu hahú ezisténsia hosi tinan 2017 to’o agora, infratór sira selu koima hamutuk $575.660.
Durante ne’e AIFAESA, I.P seidauk iha armazen atu akomoda produtu liu prazu sira.
“Ami-nia difikuldade mak seidauk iha armazen espesífiku atu akomoda produtu sira ne’ebé ami halo apreensaun, entaun sasán sira ne’ebé foti mai rai de’it iha AIFAESA, ida-ne’e ladun seguru ba ami-nia funsionáriu sira maibé ami planu ona tinan oin sei sosa kontentór ida atu rai sasán halo apreensaun tanba iha sasán oin-oin presiza armazen,” nia tenik.
Jornalista : Arminda Fonseca
Editora : Julia Chatarina
