Tinan ne’e, movimentasaun ilegál iha fronteira terrestre hahú menus

DILI, 19 dezembru 2022 (TATOLI)— Komandante Unidade Patrollamentu Fronteira (UPF), Superintedente Polisia, Euclides Belo, informa kazu movimentu pasajen ilegál no atividade ilisitu iha fronteira hahú menus, iha tinan ne’e (2022) kompara ho tinan kotuk (2021).
“Ha’u hanoin depois Governu liuhosi Ministériu Interiór liuhosi kooperasaun Timor-Leste Police Development Program (TLPDP) kontrui postu polisia hamutuk 13, nune’e ita hahú koloka nian membru sira bá postu hirak hodi fó seguransa, tanba ne’e kazu ba atividade ema tama-sai ilegál hahú menus la hanesan tinan sira kotuk”, Komandante UPF ne’e hateten ba jornalista sira iha Postu Integradu fronteiro Batugade, segunda ne’e.
Iha loron 16 dezembru, UFP, Komandu PNTL no militár hamtuk ho forsa SATGAS linta batas RI-RDTL ne’ebé envolve POLRI hosi POLRES Belu Nusa Tengara Timor halo patrollamentu konjunta iha liña fronteira ho objetivu hodi garante katak seguransa liña fronteira ne’e iha koordenasaun ne’ebé di’ak.
Iha atividade ne’e, nia dehan la deteta atividade transaksaun ilegál no movimentu ilegál sira, maibé UPF identifika mak liña demarkasaun TSL 12 Nno 13 mota hahú sobu ona hanesan iha área Badut Mean-Maliana nian.
“Tanba maioria demarkasaun ne’e ita nia barak liu iha mota laran, maibé GPS kontinua halo identifikasaun ita la’o tuir hodi halo kontrolu ba liña fronteira. Maske demarkasaun sira mota hahú sobu ona, maibé la hamete serbisu PNTL no F-FDTL atu garante seguransa ba soberanu Estadu Timor-Leste”, nia garante.
Daudaun, Ministériu Administrasaun Estatál (MAE) hahú kontrata kompañia Mira-Mar hodi konstrui moru demarksaun ba liña fronteira ne’ebé mota sobu ona iha Mota-Ain.
“Ami hanesan ajente seguransa ne’ebé fó seguransa ba iha liña fronteira sente kontente tanba governu tau matan no konstrui fala ita nia demarkasaun sira ne’e, nune’e ba futuru ita bele halo serbisu kontrolu ba liña fronteira ho di’ak”, katak.
Jornalista: Natalino Costa
Editór : Florencio Miranda Ximenes

