Top

MD husu sidadaun kontribui pás no estabilidade iha Natál-Tinan Foun

Ministru Defeza, Filomeno da Paixão de Jesus. Imajen Tatoli/Francisco Sony

DILI, 22 dezembru 2022 (TATOLI) – Ministru Defeza (MD), Filomeno da Paixão de Jesus husu ba ema hotu iha nasaun atu kontribui pás no estabilidade atu selebra Santo Natál no Tinan foun la’o iha ámbitu hakmatek nia laran.

“Natál no Tinan foun ida ne’e hanoin fali ba ita nia espiritu, hanoin ba ita nia mente no kontribuisaun ba pás iha nasaun ne’e, atu nune’e iha nasaun ne’e ita bele tuur iha pás no hakmatek, Nune’e husu ba ema hotu atu konsentra ba nia familia atu selebra Santo Natál ne’e ho di’ak”, Ministru Filomeno ne’e aifmra iha Dili, kinta ne’e.

Governante ne’e dehan joven sira atu evita konflitu, atu nune’e Polisia Nasionál Timor – Leste (PNTL) no FALINTIL-Forsa Defeza Timor – Leste (F-FDTL) atu labele tun ba halo atuasaun, nune’e bele selebra mós Natál no Tinan foun ho ida-idak nia família.

“Ita rasik halo pás ba ita nia família, halo pás ba ita nia rain, ida ne’e mak hatudu ita nia nasionalizmu, ita nia patriotizmu ba ita nia nasaun”, nia haklaken.

Iha Biban hanesan, Xefe Estadu Maiór FALINTIL-Forsa defeza Timor-Leste, Tanente Jenerál Falur Rate Laek, hato’o mós Natál Ksolok no Tinan foun ba povu Timor – Leste no husu ba ema hotu atu kria pás no hakmatek iha nasaun ne’e.

“Natál ida ne’e espesiál ba ita tanba ita foin mak liu situasaun la di’ak lubuk ida hanesan Covid-19, kalamidade boot, krize finaseiru, nune’e ita labele kria tan konflitu iha Natál ida ne’e, hosik ita atu bele moris iha situasaun hakmatek iha ámbitu selebrasaun Santo Natál no Tinan Foun”, nia dehan.

Jornalista: Hortencio Sanchez

Editór        : Florencio Miranda Ximenes

Publisidade

Leave a Reply

Latest Post

error: Content is protected !!