Janeiru to’o dezembru, HNGV rejista pasiente fase-raan 47 no óbitu na’in-19
DILI,23 dezembru 2022 (TATOLI)— Espesialista Neofrolojia iha Hospitál Nasionál Guido Valadares (HNGV), Gustavo Rosario da Cruz, informa hahú hosi janeiru to’o dezembru, 2022 konsege rejista pasiente fase-raan hamutuk 47, hosi númeru ne’e na’in-19 mak lakon vida.
“Husi janeiru to’o dezembru, pasiente foun ba fase raan hamutuk 47, husi númeru ne’e pasiente 19 mak mate tanba sofre komplikasaun”, Espesialista Neofrolojia ne’e hateten ba Jornalsita sira iha HNGV-Bidau, sesta ne’e.
Pasiente sira ne’e balun husu alta pedidu fila ba uma halo tratamentu ho ai-moruk tradisionál to’o ikus sira fali mai ospitál balun mate iha ne’e no balun mate iha uma.
“Iha pasiente fas-raan tuan ne’ebé durante tinan 2021 nian halo tratamentu ne’e na’in- 96, husi númeru ne’e balun mós lakon vida”, nia afirma.
Mákina fase-raan iha HNGV undiade hamutuk 12, husi ne’e mákina ida mak uza ba pasiente sira ne’ebé mak sofre infesaun.
“Tinan oin ita mós sei instala mákina foun balun iha HNGV no ba oin presiza tan kapasitasaun ba profisionál saúde sira, la’ós ba médiku de’it, maibé ba mós ba enfermaria nian ita presiza rekursu umanu iha espesialidade. Tanba daudaun ita iha médiku na’in-haat timor-oan no ida sei estudu hela, nune’e seidauk sufisiente atu kobre hotu ba munisípiu sira”, nia afirma.
Nune’e, nia espera ba futuru Governu bele investe maka’as hodi instala tan unidade balun iha munisípiu sira liuliu ospitál referál tanba kazu fase-raan ne’e barak mai husi munisípiu sira.
“Ita hotu hotu konserta iha nasionál tanba ne’e mak presiza aumenta ekipamentu no rekursu umanu iha munisípiu tanba populasaun sira ne’e maioria moris iha agrikultór no ekonomikamente menus”, katak .
Jornalista : Felicidade Ximenes
Editór : Florencio Miranda Ximenes
