MTKI apoia nesesidade bázika ba vítima inséndiu iha Taibesi
DILI, 23 dezembru 2022 (TATOLI)— Governu liuhosi Ministériu Turismu, Komérsiu no Industria (MTKI), sesta ne’e, ho iniativa apoia nesesidade bázika ba vítima insendiu hamutuk uma-kain 54 iha Mekadu Taibesi, munisípiu Dili.
Biban ne’e, Ministru José Lucas do Carmo da Silva, hateten hafoin inséndiu ekipa sira mai kedas halo levantamentu dadus atu halo atuasaun ka fó apoia emidiata ba vítima inséndiu iha merkadu Taibesi.
“Ita ajuda nesesidade bázika ne’ebé urjente ba vítima sira mak hanesan foos, mina, supermie, sabaun, eskova nehan no seluk tan tanba ida ne’e mak importante tebes, nune’e ami lori uluk ida ne’e mai atu oinsá atu hakmaan sira iha situasaun defisil ida ne’e”, Ministru José Lucas afirma, hafoin entrega nesesidade bázika ne’e iha Taibesi, sesta ne’e.
Tuir nian, hafoin halo observasaun jerál hatudu katak tenke iha kooperasaun ho liña ministeriál sira atubele apoiu liu tan ida ne’e.
“Ohin, ami mós nota katak maluk sira presiza lona, maibé ne’e husi parte Ministériu haree lai iha posibilidade oinsá atu sira bele uza hodi toba tanba ba oin ne’e sei iha liña ministeriál atu trata ida ne’e”, nia afirma.
Iha fatin hanesan, vítima inséndiu iha Taibesi , Daniel Soares agradese ba Ministériu Turismu, Komersiu no Indústria (MTKI) tanba apoiu ona nesesidade bázika ba sira hodi hakmaan sofrementu ne’ebé iha.
“Ami agradese ba MTKI ne’ebé tulun ami ho sasan nesesidade bázika, liuliu ami sira ne’ebé mak hetan sofrementu ida ne’e”, nia agradese.
Molok ne’e, Ministériu Administrasaun no Estatál (MAE) apoiu mós apoia ona foos saku 50 no bee aqua kaixa hamutuk 30 no Sekretária Estadu Protesaun Sivil mós apoiu bee aqua kaixa 30 no biskuat kaixa ualu, inklui Madre Fransiscana no Loja Amadia mós fó apoia ona nesesidade balun ba vítima inséndiu uma-kain hamutuk 54.
Jornalista : Felicidade Ximenes
Editór : Florencio Miranda Ximenes
