PNTL Dili rejista asidente tráfegu 10 durante selebrasaun Natál

DILI, 26 dezembru 2022 (TATOLI)— Komandu Polísia Nasionál Timor-Leste (PNTL), munisípiu Dili, liuhosi Unidade Tránzitu, rejista asidente tráfegu durante selebrasaun Santo Natál.
Komandante Tránzitu Polisia Nasionál Timor-Leste (PNTL), Munisipiu Dili, Inspetór Polísia, Domingos Gama, informa, durante selebrasaun natál rejista kazu asidente tráfegu 10 iha munisípiu Dili.
“Durante selebasaun Santo Natál, ita rejista asidente tráfegu hamutuk 10. Hosi kazu asidente rejista iha loron ne’ebé la hanesan hanesan iha loron sábadu (24/12) PNTL rejista kazu asidente tráfigu hitu (7), Enkuantu iha loron Domingu (25/12) rejista kazu asidente tolu”, Komandante ne’e hateten ba Jornalista sira iha knar fatin, Caicoli, segunda ne’e.
Hosi totál kazu asidente tráfegu sira ne’e ho tipu kazu asidente kamaan de’it tanba motorista sira ho kondisaun lanu.
“Tanba ita hatene tama ona loron bo’ot ne’e iha kazu asidente tráfegu ne’e, ita la rejista ema mate. Ha’u bele dehan katak kazu asidente tráfegu iha selebrasaun Natál 2022 ne’e numeru tun tebes kompara hanesan tinan sira kotuk”, katak nia.
Apreensaun motór 12 no karreta tolu
Alende ne’e, Komandante ne’e dehan iha loron bo’ot Natál, halo mós apreensaun ba ba motorizada hamutuk 12 no karreta bo’ot tolu.
“Durante loron bo’ot Natál iha dia 24 ho 25, ami halo apreensaun ba transporte hamutuk 15, mak hanesan motór 12 no karreta pezadu tolu”, nia informa.
Veíkulu hirak ne’e hetan apreensaun tanba viola lei kóndigu estrada no viola regra despaisu konjunta ne’ebé mak antes ne’e Ministériu Transporte no Komunikasaun ho Ministériu Interiór (MI) fó sai katak proíbe karreta kontetór hala’o sirkula iha oras ne’ebé determina hanesan 11:59 dader to’o 13:59 no 18:00-21:00 inklui 24:00- 07:00 dader.
“Iha loron boot Natál, realialidade karreta pezadu sira kontinua halo movimentu iha loron, nune’e hetan apreensaun ba karreta pezadu sira ne’e”, katak.
Karreta Kontentór ne’ebé viola despaisu ne’e la tolera no sei aplika sasaun koima tuir lei kódigu estrada numeru 6/2003 iha artigu 10 katak infratór sira tenke selu koima ho valór $75.
Jornalista: Natalino Costa
Editór : Florencio Miranda Ximenes

