DILI, 03 janeiru 2023 (TATOLI) – Komandante Polísia Nasionál Timor-Leste (PNTL) Munisipiu Lautém, Superintendente António Rego Fernandes, informa kazu asaltu malu entre joven sira, rezulta nain ida nain-ida lakon vida no sira seluk kanek todan no kaman, polísia detein ona suspeitu nain-lima. Akontesimentu ne´e iha Aldeia Chay, Suku Lore I, Postu Adminisrativu Lore, Munisipiu Lautém.
“Ha’u atu informa katak iha selebrasaun tinan foun, mosu asaltu malu entre joven sira iha Postu Lore, kazu ne’e akontese bainhira joven sira iha fatin ne’eba vizita uma ba uma. hodi komprimenta malu kona-ba simu tinan foun nian. Entaun aproveita ida ne’e, joven sira halo asaun tuda malu hodi rezulta Denito Brasil (27) mate, inklui ema nain rua ida hetan kanek todan no ida seluk kanek kaman, agora halo hele tratamentu iha óspitál Lospalos”, Komandante PNTL Munisipiu Lautém, Superintendente António Rego Fernandes, informa ba Agência TATOLI via telefônika, tersa ne’e.
Kazu ne’e akontese iha domingu (01/1), oras 00:00 madrugrada, bainhira joven sira simu tinan foun hodi ba komprimenta malu, derepente mosu asaltu entre joven sira, nune’e iha aslatu ne’e rezulta joven nain ida lakon vida, joven nain rua maka kanek, ida kanek todan no joven ida seluk kanek kaman.
Nia hatutan, matebian Denito Brasil nia mate isin dadaun ne’e família transporta ona ba mai iha Hospitál Nasionál Guidu Valadares (HNGV) hodi halo prosesu autópsia.
António esplika hafoin akontesimentu ba kazu asaltu malu ne’ebé rezulta Denito Brasil hakotu nia vida, família matebian iha Lore la satisfaz hodi kontinua halo reajen ba suspeitu sira ne’ebé deskonfia oho vítima, nune’e família hosi vítima ba sunu suspeitu sira nia uma iha Lore.
“Família vítima sira sira halo reajen tanba la satisfas, nune’e sira ba hodi sunu suspeitu sira nia uma hamutuk tolu inklui motór tolu”, katak.
Superintendente Polísia dehan ba kazu asaltu malu ne’e, Komandu PNTL Lautém detein ona suspeitu nain lima ba kazu ne’e. Komandu PNTL Lautém halo ona auto notisia hodi entrega suspeitu sira ba Ministeriu Públiku hodi kontinua prosesu ba oin.
“Dezde akontesimentu asaltu malu iha loron (1/1) madrugada ne’e ita detein supeitu balun ona to’o ohin ita detein ema nain lima ona, agora suspeitu sira ne’e ita halo on auto notisia no entrega ona ba Ministeriu Públiku”, dehan Nia.
Aleinde ne’e, António mós friza iha selebrasaun tinan foun, PNTL Munisipiu Lautém mós rejista kazu krime rua seluk iha suku Fuiloru, Aldeia Kulu-Hun.
“Mosu asaltu malu entre joven sira iha área refere bainhira sira ba komprimenta malu hosi uma ba uma, derepente iha ema deskoñsidu sona joven ida no suspeitu halai lakon no momentu ne’e kedan vítima nia kolega sira konsege lori vítima ba halo tratamentu iha óspitál Lospalos Villa”, haktuir.
“Ami sei kontinua buka tuir vítima ne’e no prosesu ba nia sei kontinua la´o, sei la para tanba ne’e ita konsidera krime”, revela.
Iha mós konfrontu ida iha área Serelau, Lospalos Villa, mosu asaltu malu entre joven sira bainhira hemu tua hamutuk hodi simu tinan foun iha momentu ne’ebá derepente iha grupu ida mai asaltu joven sira iha área ne’eba no rezulta motór ida baku rahun no motór ida sunu.
Nia afirma iha tán kazu krime rua seluk ne’ebé akontese iha Munisipiu Lautém durante selebrasaun tinan foun.
“Durante selebasaun tinan foun ita rejista kazu krime lima hosi kazu lima ne’e, maioria akontese iha loron (01/1/202) madrugada bainhira ita simu tinan foun kauza hosi joven sira hemu tua hodi festeza simu tinan foun”, katak.
Rekorda katak iha selebrasaun natál Komandu PNTL Lautém la rejista kazu krime ruma, situasaun iha selebrasaun natál iha Munisipiu Lautém la’o hakmatek no kontroladu.
Jornalista: Natalino Costa
Editór : Zezito Silva
