DILI, 03 janeiru 2023 (TATOLI)—Xefe suku Motael, postu administrativu Vera Cruz, munisípiu Dili, Luis Gusmão Viegas, informa iha suku Motael ne’e totál uma kain 1.524 no hosi númeru ne’e uma kain 1.319 mak simu ona subsídiu $200 no uma kain 207 mak seidauk simu.
Notísia Relevante: Pagamentu subsídiu $200 hela Dili-RAEOA mak seidauk finaliza
Nia hateten, hosi uma kain 207 ne’e ema-ne’ebé ho nia rendimentu mensál $500 ba leten inklui eis Prezidente Repúblika Francisco Guterres Lú Olo, membru Governu balun no Prezidente Parlamentu Nasionál, Aniceto Longuinhos Guterres Lopes, deside lakohi simu subsídiu $200.
“Hosi uma kain 207 ne’e, ema-ne’ebé ho nia rendimentu boot inklui emprezáriu sira no membru Governu mak deside lakohi simu subsídiu $200. Nune’e mós eis Prezidente Repúblika, Francisco Guterres Lú Olo no Prezidente Parlamentu Nasionál, Aniceto Longuinhos Guterres Lú Olo m’os deside lakohi simu subsídiu fim do ano $200 ba uma kain,” Xefe suku Motael ne’e hateten ba Agência Tatoli liuhosi telefónika, tersa ne’e.
Suku Motael iha aldeia lima (5) ne’ebé kompostu hosi aldeia Boa Morena ho nia osan hamutuk $79.400, aldeia Hura ho osan $24.400, Bee Dalan ho osan $49.400, Lirio $42.400 no aldeia Halibur $67.600.
Hosi totál uma kain iha suku Motael hamutuk 1.524 ne’e, iha uma kain 1.319 mak simu ona subsídiu fim do ano $200 ho nia osan $263.400 hosi totál osan alokadu $304.800, maibé iha xefe família rua mak fó fila osan tanba saláriu mensál $500 ba leten.
Iha dekretu-lei 37/2022, artigu 2 ne’e hateten katak família ne’ebé sai benefisiária ne’e ninia membru ida mak nia rendimentu liu $500 ne’e labele simu.
Jornalista : Osória Marques
Editór : Cancio Ximenes
