DÍLI, 03 janeiru 2023 (TATOLI) – Diretór Klínika hosi Hospitál Nasionál Guido Valadares (HNGV), Marcelino Correia, dehan fulan maiu to´o dezembru 2022, pasiente ne’ebé mak halo escrening ba kankru serviks hamutuk 156, no na’in neen mak pozitivu.
“Maiu to´o dezembru, ita-nia pasiente ne’ebé mak halo escrening ba kankru serviks hamutuk 156, husi númeru ne’e, ita deteta pozitivu ba kankru serviks na’in neen, husi ne’e, na’in tolu halo tratamentu iha ne’e, no na’in tolu halo tratamentu kontinu iha rai-liur”, Diretór Klínika HNGV, Marcelino Correia, hateten ba jornalista sira iha nia kna’ar fatin HNGV, ohin.
HNGV deteta moras sira ne’ebé ho escrening hanesan human papiloman virus ka (HPV), entaun halo tratamentu hotu iha ne’e, tanba ne’e husu ba inan feton sira hodi nafatin mai ospitál atu kontinua halo cek up hodi hatene ita bo´ot sira moras hodi halo tratementu sedu.
“Tanba ne’e mak ita halo escrening banhira deteta pozitivu, husu sira nafatin cek up rutina kada semana rua no sira ne’ebé mak negativu ita haruka sira mai cek up fila fali kada tinan tolu. Sira ne’ebé mak iha problema ho infesaun, halo tratamentu depois ida ne’e mai fila fali halo chek up kada fulan ida no bele to´o mós fulan tolu, hodi hatene kona-ba progressu husi moras ne’e atu nune’e halo atendimentu sedu, moras labele sai avansadu liu, no la bele fó impaktu ba sira nia moris”, revela.
Tanba ne’e, unidade obstretia nafatin halao servisu ida ne’e hodi atende ba munisípiu 13 iha teritoriu nasionál depois hetan referál husi sentru saúde sira ne’e atu halo prevensaun sedu ba inan feton sira ne’ebé ho problema moras serviks.
“Ita nafatin enkoraja inan sira husi idade 30 ba leten mai nafatin halo cek up ba sira nia moras atu profisionál saúde sira halo atendimentu sedu tanba ita hatene katak kankru ne’e iha estadiun ida, rua ne’e mai ona ospitál maibé ba estidum haat ne’e siginifika avansadu susar ona atu kura”, konklui.
Jornalista : Felicidade Ximenes
Editór : Zezito Silva
