2022: Ema lakon vida tan moras dengue hamutuk 57
DÍLI, 04 janeiru 2022 (TATOLI) – iha 2022, Diresaun Nasionál Saúde Públika, Ministériu Saúde rejista ema mate tan moras dengue hamutuk 57 hosi total moras 5.624.
Diretór Nasionál Saúde Públika, iha Ministériu Saúde, Frederico Bosco, hateten moras dengue, hahú janeiru-dezembru, hamate labarik sira ho idade menus hosi 14 iha facilidade saúde sira iha território nasionál.
“Labarik sira idade menus husi 14 mak afetadu tebes ba kazu dengue sira ne’e, totál moras dengue 5.624 no mate 57. entaun inan aman sira tenke tau atensaun ba oan sira karik iha ona sintomas bele lori lalais ba fasilidade saúde ne’ebé mak besik hodi simu atendimentu di´ak husi profisionál saúde sira”, Frederico Bosco, dehan iha salaun MS, Caicoli, ohin.
Nia husu ba komunidade sira atu hamoos tanke bee no seluk tann nune´e bele prevene moras dengue.
“Maioria ita enkoraja ita-nia komunidade sira antes ba prevensaun nian, hamoos tanke bee iha uma laran, bidon sira, vazu aifunan, tenke troka bee kada semana no labarik sira iha uma karik tenke uza replente no toba iha muskiteriu”, revela.
Aleinde iha prevensaun seluk mak hanesan autoridade lokál sira tenke servisu hamutuk ho nia komunidade halo limpeza jerál iha sira nia bairo atu nune’e evita susuk tolun no evita kazu la bele sa’e maka’as.
Jornalista : Felicidade Ximenes
Editór : Zezito Silva
