DILI, 05 janeiru 2023 (TATOLI) – Ministériu Justisa liuhosi Diresaun Jerál Serbisu Rejistu Notariadu (DGSRN), hahú simu inskrisaun kandidatu partidu foun haat, kompostu hosi Partidu Fitun, Partidu Dezenvolvimentu Sosial (PDS), Partidu Aliança Nacional Democrata (AND), no Partido Forte Timor (Partifor).
“Daudaun ne’e iha kandidatu partidu foun haat maka submete ona sira nia dokumentu mai iha Diresaun Jerál Serbisun Rejistu Notariadu (DGSRN)), partidu sira ne’e maka hanesan Partidu Fitun, Partidu Dezenvolvimentu Sosial(PDS), Partido Aliança Nacional Democrata (AND), no Partido Forte Timor (Partifor)”, Diretór Jerál Servisu Rejistu Notariadu, Crisogno da Costa Neto, ba jornalista TATOLI, via telefone, kinta ne’e.
Ministériu Justisa liuhosi DGSRN halo ona verifikasaun ba dokumentu sira tuir lei númeru 2/2016, 3 Fevereiru, ne’ebé mak halo altersaun dahuluk hosi lei númeru 3/2004, 13 Abril, kona-ba partidu polítiku no rekezitu atu harii partidu foun iha artigu 13 ho 30.
“Hosi verifikasaun dokumentu ne’ebé ita halo hosi kandidatu partidu foun haat ne’e iha kandidatu partidu foun PDS ninian dokumentu maka verifika hotu ona no submete ona ba Gabinete Ministru Justisa atu halo apresiasaun no desizaun“, hateten.
Nia esplika, kandidatu partidu Fitun, dadaun ne’e sei iha hela prosesu verifikasaun dokumentu.
“Semana oin ami sei submete ba iha Gabinete Ministru Justisa atu halo verifikasaun ba dokumentu kandidatu partidu polítiku nian tuir lei haruka”, katak.
Enkuantu kandidatu partidu foun rua seluk hanesan kadidatu partidu Timor Forte (Partifor) no Aliança Nacional Democrata (AND), Crisogno da Costa Neto, hateten Ministériu Justisa liuhosi DGSRN husu atu kompleta tan sira nia dokumentu balun tuir rekezitu tuir lei númeru 2/2016 de 3 de Fevereiro, ne’ebé maka halo altersaun dahuluk hosi lei númeru 3/2004, 13 Abril, kona-ba partidu polítiku no rekezitu atu harii partidu foun iha artigu 13 ho 30 haruka.
Diretór Jerál akresenta partidu polítiku ne’ebé maka ninian estatutu hanesan partidu rejista ona iha Tribunál Rekursu maka partidu Os Verdes de Timor.
Entertantu rekezitu lei númeru 2/2016, 3 Fevereiru, ne’ebé mak halo altersaun dahuluk hosi lei númeru 3/2004, 13 Abril, iha artigu 13.° kona-ba rekezitu inskrisaun.
- Atu sai partidu pólitiku tenke mai ho apoiante menus 20.000.
- Kandidatu partidu polítiku sira tenke subemete sira nia nia dokumentu ba Ministériu Justisa.
- Dokumentu sira ne’ebé maka submete ba ne’e tenke ho apoiante sira nia dokumemtu komprovativu sira hanesan kartun identidade foto kopia, Pasaporte no Sertidaun Moris.
- Ministériu Justisa liuhosi DGSRN maka bele halo autentikasaun ba dokumentu sira ne’e hodi rejistu iha rejistu sivil.
- Kandidatu partidu polítiku sira hatama sira nia dolumemtu mai iha Ministériu Justisa antes fulan neen antes eleisaun.
Iha artigu 30 ne’e koalia kona-ba autentikasaun ba dokumentu sira.
Jornalista: Natalino Costa
Editór : Zezito Silva
