OÉ-CUSSE, 05 janeiru 2023 (TATOLI) – Projetu ba sentru emprezariál hanesan edifisiu Servisu Rejistrasaun no Verifikasaun Emprezariál, Institutu Públiku (SERVE,IP) no edifisíu Institutu Apoiu Dezenvolvimentu Emprezariál (IADE), daudaun ne’e progresu fíziku atinje ona pursentu 80.27.
Nune’e, serbisu fíziku ne’ebé empreza konstrui mak hanesan, edifisíu ba SERVE,IP nia médida metru 18×8 no edifisíu ba IADE, ho nia médida metru 34×12, moru haleu, fasilidade ba seguransa ho sanitária no tanki bee-moos.
“Konstrusaun ne’e atinje ona 80.27%, nia kontratu ne’e ba fulan-haat. Tuir loloos remata ona maibé atraza iha mobilizasaun ekipamentu, agora mós tama ona tempu udan, maibé ita garante sei konklui iha tempu badak, tanba serbisu fíziku kuaze hotu ona, hela de’it serbisu kmaan sira hanesan instalasaun eletrisidade, AC no seluk tán,” Rofinu Abi ko’alia nu’udar tékniku ba konstrusaun ne’e iha Oé-Cusse, kinta ne’e.
Iha parte seluk, jornalista Tatoli tenta atu konfirma asuntu ne’e ho Sekretáriu Rejionál ba Turízmu Komunitáriu, Pedro da Silva Boquifai, maibé la konsege tanba okupadu ho serbisu seluk.
Entretantu, konstrusaun ne’e ezekuta hosi empreza Aprilia Unipesoál, Lda, ho valór kontratu $297,488.80, Autoridade RAEOA aloka hosi Orsamentu Jerál Estadu (OJE) 2022 nian ho durasaun servisu durante fulan haat.
Jornalista: Abílio Elo Nini
Editór: Evaristo Soares Martins
