OÉ-CUSSE, 06 janeiru 2023 (TATOLI) – Diresaun Edukasaun Rejiaun Administrativa Espesiál Oé-Cusse Ambeno (RAEOA), sesta ne’e simu ona dokumentu lista estudante ne’ebé asesu mellór klasifikadu atu hetan bolsa méritu hosi Ministériu Edukasaun, Juventude no Desportu (MEJD).
Diretór Edukasaun RAEOA, Daniel Mauno, esplika, bolsa méritu ba estudante sira-ne’ebé hetan valór di’ak, Ministériu Edukasaun orienta mai no prosesu tomak hotu ona.
“Nia rezultadu ita simu ona ohin hosi ministériu, agora foin verifika tanba lista mai ne’e barak iha kedas eskola 100-resin, entaun ita sei verifika estudante hira hetan mellór klasifikadu ne’e, ne’ebé dadus ita sei públika iha tempu tuir mai,” Daniel Mauno, informa ba Agência Tatoli iha Oé-Cusse, sesta ne’e.
Nia afirma, estudante atu hetan bolsa méritu ne’e, mai hosi eskola hotu-hotu iha territóriu Oé-Cusse, hanesan ensinu báziku, ensinu sekundáriu jerál no ensinu tékniku vokasionál.
“Ita iha munisipíu, ita-nia serbisu maka oinsá ita haree atu klasifika estudante sira, tuir nível ensinu idak-idak, nune’e estudante-sira mós bele hetan oportunidade ba bolsa ida-ne’e, purtantu prosesu sira-ne’e hotu tiha ona, daudaun ne’e sei verifika hela, depois informa ba estudante sira-ne’ebé merese atu simu bele ba loke ona konta bankária iha banku BNCTL,” nia katak.
Tuir nia, iha faze identifikasaun ba klasifikasaun estudante sira mai hosi estudante pasajen klase, ensinu báziku primeiru siklu, segundu siklu depois hosi 110 anou ba 120 anu.
Alende ne’e estudante finalista sura hosi ensinu báziku terseiru siklu ba 90 anu no ensinu sekundáriu jerál no tékniku vokasionál, maibé nia totál seidauk hatene tanba sei halo hela verifikasaun ba lista estudante sira kada eskola.
“Verifikasaun agora la’o hela tanba lista mai barak, depois ita aviza ba eskola hotu-hotu, estudante hira mak naran sai, agora dadus ha’u seidauk hatene,” nia afirma.
Tuir dadus ne’ebé Agência Tatoli asesu liuhosi MEJD katak, antes ne’e parte MEJD prevee orsamentu hamutuk millaun $7,2 ba estudante identifikadu sai mellór klasifikadu iha territóriu tomak.
Nune’e ba primeiru klasifikadu sei hetan $600,00, segundu klasifikadu hetan $550,00, terseiru klasifikadu hetan $450,00 no kuartu klasifikadu sei hetan $400,00.
Jornalista : Abílio Elo Nini
Editór : Evaristo Soares Martins
