Tinan 2022, PRADET rejista kazu 250 iha rejionál Baucau
BAUCAU, 06 janeiru 2023 (TATOLI) – Psychosocial Recovery and Development in East Timor (PRADET) rejionál Baucau, rejista kazu violénsia doméstika no abuzu seksuál ba minoridade hamutuk 250 iha tinan-2022.
Koordenadora PRADET rejionál Baucau, Joana da Costa, esplika, hosi númeru kazu refere violénsia doméstika hamutuk 200-resin no abuzu seksúal hasoru minoridade besik 50, ne’ebé tipu krime públiku no kazu sivíl abandonadu hamutuk 10-resin kontinua prosesa hotu iha Ministériu Públiku.
“Hosi númeru 250 ne’e kuaze kazu kontinua prosesu iha Ministériu Públiku no balun iha ona trinunál hodi hein sentensa hodi kontinua ba kadeia,” Koordenadora PRADET rejionál Baucau informa ba TATOLI iha Vila Antiga, sesta ne’e.
Maioria kazu akontese barak iha munisípiu Baucau hanesan postu Baucau vila, Venilale, Quelicai, Baguia, Laga no Vemasse ne’ebé kauza hosi violénsia doméstika mak problema ekonomia no violasaun seksuál kauza hosi asesu ba internete.
PRADET iha kooperasaun ho parseiru sira hanesna Uma Pas Baucau ne’ebé sai fatin seguru ba vítima sira inklui uma-mahon seluk hanesan FOKUPERS no Casa vida iha Dili.
Alende ne’e, koordenasaun serbisu direita ho autoridade suku hanesan xefe aldeia no suku hodi hatutan informasaun kona-bá problema komunidade nian iha baze, liuliu métodu no sistema prevensaun violénsia doméstika no violasaun seksuál hasoru minoridade.
“PRADET kontinua serbisu mós ho Ministériu Solidariedade Sosiál no Inkluzaun inklui PNTL VPU hodi kontinua redús kazu hasoru labarik,” Joana da Costa akresenta.
PRADET Baucau kompromete iha tinan-2023 kontinua halo advokasia ba komunidade sira iha área rurál nune’e ajuda hasa’e koñesementu kona-bá prevensaun atubele redús númeru violénsia doméstika no violasaun seksuál hasoru minoridade.
Jornalista : Natalino Belo
Editór : Evaristo Soares Martins
