DILI, 07 janeiru 2023 (TATOLI)–Komandante Polísia Nasionál Timor-Leste (PNTL) munisípiu Lautém, Superintendente Polísia, António Rego Fernandes, informa, kazu asalta malu ne’ebé akontese iha aldeia Etevata, suku Tirilolo, postu administrativu Iliomar, munisípiu Lautém, tanba hadau malu rai.
“Kazu ne’ebé akontese iha suku Tirilolo, konforme relatóriu ne’ebé ha’u simu tanba parte rua hanesan vítima no suspeitu sira disputa ka hadau malu rai lokalizadu iha área ne’ebá, ne’ebé daudaun sai ona fatin ba rate antigu,” Superintendente Polísia, António Rego Fernandes, informa Agência Tatoli, via telefónika, sábadu ne’e.
Kazu ne’e akontese iha sesta (06/01) maizumenus tuku 19:00 kalan, bainhira mosu diskusaun rai iha área haloot mate-isin, hosi parte vítima sira deklara katak rai iha área refere hanesan sira-nian, nune’e mós parte suspeitu sira mós deklara katak rai ne’e sira-nian tanba nu’udar rai eransa.
Ho nune’e, parte rua la simu malu no mosu dezentendimentu to’o asalta malu hodi rezulta ema na’in-haat kanek todan no transporta ona ba ospitál Referál Baucau hodi hetan tratamentu intensivu.
Notísia relevante: Kazu taa-malu iha suku Uma-kiik Viqueque, vítima mate iha fatin
Komandante Polísia dehan, bainhira parte rua asalta malu, PNTL Eskuadra Iliomar tun kedan bá terrenu hodi halo intervensaun hakalma situasaun.
“Vítima kazu ne’e ema na’in-tolu no suspeitu mós na’in-tolu. Daudaun ita asegura ona, ita sei halo auto-notísia ba Ministériu Públiku hodi prosesa ba oin,” nia tenik.
Iha parte ketak, família vítima, Aldo da Costa, hateten, problema entre sira ho suspeitu sira mosu kle’ur ona.
“Sira ho ami ne’e problema iha kle’ur ona, uluk sira provoka ami to’o baku uluk ha’u-nia alin tanba liga ba desputa rai ne’e.To’o mai horikalan maka problema boot, taa ha’u-nia pai. Sira preparadu ona iha uma ida, entaun sira mai ami-nia uma hodi provoka uluk ha’u-nia alin, nune’e alin kontaktu mai ami hodi dehan mai lai tanba ema atu baku ha’u, ho nune’e suspeitu sira duni ha’u-nia alin atu sona. Tanba ne’e, ha’u ho apa, ami halai bá, tanba sira prepara ona entaun sira konsege taa duni ha’u-nia apa,” nia konta tuir.
Nune’e, hosi asalta malu ne’e, rezulta Aldo da Costa nia aman hetan taa iha parte ulun, kakorok, liman, ain tur no ain, nune’e família sira lori bá óspitál Lautém maibé tanba grave, maka transporta liu bá óspitál Referál Baucau.
Jornalista : Natalino Costa
Editora : Julia Chatarina
