DILI, 09 janeiru 2023 (TATOLI)—Diretór Eskola Ensinu Báziku Sentrál (EBC, sigla portugés) Metinaro, Duarte Amaral, hateten estudante foun nivél ensinu báziku sentrál (EBC, sigla portugés) terseiru siklu hamutuk na’in-450 partisipa prosesu orientasaun eskolár durante loron lima molok hahú sira-nia prosesu ensinu aprendizajen.
Prosesu orientasaun eskolár ne’ebé mak eskola fó ba estudante na’in-450 ne’e atu lori estudante sira bele hetan koñesimentu natoon kona-ba eskola refere, tanba estudante sira kada tinan sempre troka sira-nia nivel presiza atu hasa’e sira-nia kapasidade no mentál iha amibtu foun.
Matéria ne’ebé mak eskola sei atribui ba estudante foun sira iha prosesu orientasaun eskolár durante loron lima ne’e mak edukasaun sidadania, hodi lori estudante sira tenke hatene didi’ak sira-nia obrigasaun hanesan estudante no mós hanesan povu oinsá atu sai sidadaun ida-ne’ebé di’ak.
“Ita-nia orientasaun eskolár ne’e atu motiva estudante foun sira. Maske sira mai hosi eskola oioin maibé bainhira sai ona estudante iha EBC Metinaro ne’e, sira tenke sai estudante ida iha responsabilidade ba ninia an, ba eskola no mós ba kolega sira,” Duarte Amaral ba Agência Tatoli liuhosi telefónika, segunda ne’e.
Parte eskola kria orientasaun eskolár atu estudante ida-idak bele sai estudante ida preparadu, brani hanesan jerasaun foun hodi bele partisipa iha atividade sira bainhira eskola deside au bele partisipa iha eventu ruma, relasiona ho loron nasionál sira inklui atividade eskola nian ne’e estudante ne’e preparadu ona.
Totál estudante foun ne’ebé rejistradu ona hamutuk 450 iha eskola EBC ne’e, maibé ida-ne’e sei konsidera provizória hela tanba eskola rasik kontinua tan prosesu inskrisaun ba loron tolu tan ne’ebé automatikamente dadus ka númeru ba estudante foun bele aumenta tan.
Enkuantu eskola EBC Metinaro iha sala-de-aula hamutuk ualu (8) fahe ba turma sia (9) no eskola ne’e rasik iha totál profesór hamutuk 24 kompostu hosi profesór permanente na’in-20 no kontratadu na’in-haat (4).
Jornalista : Tomé Amado
Editór : Cancio Ximenes
