Komandante prontu hatan bainhira atua kriminozu no ema preokupa violasaun DH

DILI, 09 janeiru 2023 (TATOLI) – Komandante Polísia Nasionál Timor-Leste (PNTL) Munisípiu Dili, Superintendente Xefe, Natercia Martins, prontu hatan bainhira membru polísia sira halo intervensaun ba ema kriminozu sira mak ema fila preokupa violasaun direitu umanu (DH).
“Kuandu iha intevesaun polísia mak ema preokupa violasaun direitu umanu, ha´u mak sei hatan situasaun sira hanesan ne´e”, Natercia Martins, ba jornalista sira sira iha Komandu PNTL, Caicoli, segunda ne’e.
Nia dehan dalabarak polísia sira nia intervensaun atu hakalma situasaun maibé dala barak ema kestiona maneira polisia nian kona-ba intrervesaun sira, tanba ne´e husu ba comunidade sira atu kolabora hodi prevene situasaun krime iha Dili laran.
“Iha ha’u nia tempu ne’e maka la kaer toman kriminozu sira maibé kuandu kaer toman ne’e zero toleránsia”, revela.
“Ha’u husu ita hotuhotu tenke kolebora atu nune’e prevene krime sira ne’ebé daudaun mosu atu ema labele subar fali kriminozu iha ita nia bairru, kuandu ema ruma maka halo krime kontatu polísia hodi entrega ba polísia hodi submete ba prosesu”, refere.
Nia husu ba komunidade labele públika fotografia no video sira ne’ebé kle’ur ona hodi públika fila fali iha rede sosiál hodi provoka situsaun. Hanesan kazu iha fim de semana dehan ema ida hetan ta hosi ema deskoñesidu iha área Merkadu Lama.
Maibé depois polísia buka tuir informasaun, deskobre katak fotografia ne’e kle’ur ona maka ema públika fila fali iha rede sosiál.
“Kuandu ema ruma maka sei halo hanesan ne’e polísia kuandu toman, polisia sei notifika nia no nia sei kumpre ninian prosesu no nia sei hetan ninian konsekuénsia. Tanba iha ita nian kapitál la´os ita de’it, maibé ema barak maka hela iha ne’e, informasaun falsu bele prejudika buat seluk seluk”, afirma.
Komandante mós fó ona orientasaun ba Komandane Eskuandra sira atu intensifika patrolla nune’e prevene konflitu iha Muninisípiu Dili.
“Ha’u realiza enkontru ho Komandante Eskuadra sira hodi diskute kona-ba situasun sira ne’ebé maka mosu iha kapital Dili. Ha’u husu atu sira kontinua halo servisu kontrolu seguransa ba ita nia sidadaun sira”, konklui.
Jornalista: Natalino Costa
Editór : Zezito Silva

