VIQUEQUE, 09 janeiru 2023 (TATOLI)–Sekretáriu Estadu Asuntu Kombatente no Libertasaun Nasionál (SEAKLN), Julião da Conceição ‘Loro Mesak’, informa, konstrusaun jardín eroi iha postu administrativu Uatulari, munisípiu Viqueque daudaun atinje ona 60%.
“Empreza ne’ebé kaer obra halo konstrusaun lentu demais, maibé ami-nia enjiñeiru hosi ministériu sempre mai haree beibeik hodi fó hanoin ba sira. To’o ami-nia mandatu ramata, ami hakarak restu mortál iha Uatulari tenke haloot hotu,” Sekretáriu Estadu, hateten ba Agência Tatoli, domingu (08/01), iha suku Uabubu.
Nia dehan, Governu nia planu iha tinan 2023 tenke haloot ona restu mortál iha postu Uatulari, ne’ebé daudaun sei kontinua tau iha uma-mahon no seidauk haloot iha fatin dignu.
“Empreza responsável konstrusaun iha problema orsamentu, nune’e ami halo ona karta xamada ba sira hodi aselera serbisu. Karik osan la to’o dehan la to’o. Ha’u nafatin husu ba empreza hodi aselera tanba Governu selu ona,” nia tenik.
Notísia relevante: MAKLN sei haloot restu mortál 3.740-resin iha 2023
Governu aloka orsamentu ba konstrusaun jardín eroi Uatulari ho montante $100.000, ne’ebé responsável hosi empreza Natureza Furak, Lda, ho durasaun konstrusaun ba tinan ida, maibé tanba empreza sira halo konstrusaun liu ona tinan-ida, maka Governu halo xamada hodi aselera serbisu.
Dadus restu mortál ne’ebé sei rai iha uma-mahon postu administrativu Uatulari hosi tinan 2013 to’o agora hamutuk 600.
Jornalista : Vitorino Lopes da Costa
Editora : Julia Chatarina
