DILI, 09 janeiru 2023 (TATOLI)–Ministériu Edukasaun Juventude no Desportu (MEJD) tinan ne’e sei kontinua halo pagamentu retroativu ba profesór hamutuk na’in-500 ho totál orsamentu ne’ebé prevee ona.
Notísia Relevante: Profesór 2.000 iha territóriu nasionál hetan ona pagamentu retroativu
Diretór Jerál Administrasaun no Jestaun Finansa Ministériu Edukasaun Juventude no Desportu, Antoninho Pires, hateten ministériu iha ona orsamentu ne’ebé prevee kada tinan ho totál millaun $75 hosi saláriu vensimentu atu utiliza hodi halo pagamentu retroativu ba metade profesór ne’ebé seidauk hetan sira-nia direitu.
“Ha’u hakarak informa ba ita-boot sira katak ita iha totál profesór hamutuk 1.500 mak hetan direitu ba retroativu ne’ebé tinan kotuk ita halo ona pagamentu ba professor na’in-1.000 no agora ita sei halo pagamentu tan ba professor na’in-500,” Antoninho Pires hateten ba Agência Tatoli iha ninia gabinete MEJD Vila Verde, segunda ne’e.
Ministériu Edukasaun kontinua konsidera nafatin profesór sira-nia direitu, tanba ne’e ministériu lakohi kontra no viola profesór sira-nia direitu hodi tau nafatin orsamentu ba retroativu ne’e atu selu nafatin.
Pagamentu retroativu ne’e, nia dehan, kada tinan sempre realiza ba profesór sira-ne’ebé iha progresu ba eskalaun, tanba balun tinan kotuk la konsege hetan entaun tinan ida-ne’e bele hetan oportunidade hodi hadi’a eskalaun.
Hosi dadus ne’ebé iha hatudu katak totál profesór sira-ne’ebé mak iha progresu ba eskalaun ne’e hamutuk 2.000 mak hetan ona pagamentu ba retroativu iha territóriu nasionál.
Iha dezembru ne’e, Governu liuhosi ministériu edukasaun konsege halo pagamentu retroativu ba profesór 1.000 no hein de’it atu selu tan profesór 500 hodi kompleta dadus ne’ebé iha.
Jornalista : Tomé Amado
Editór : Cancio Ximeens
