MESSK lansa korresaun ba pontu ezame rezime espesiál asesu ensinu superiór
DILI, 09 janeiru 2023 (TATOLI)–Ministériu Ensinu Superior Siénsia no Kultura, segunda (09/01) ne’e, lansa halo korresaun ba pontu ezame rejime espesiál ne’ebé kuaze estudante hamutuk na’in 3.065 hosi minisípiu sira.
Ministru Ensinu Superior Siénsia no Kultura (MESSK), Longuinhos dos Santos, relata prosesu ida ne’e hanesan faze inísiu ba tinan foun 2023 ne’ebé hahú ho korresaun ba ezame rejime espesiál nian liu-liu ba estudante sira atu asesu ensinu superiór iha tinan akdémiku 2023 ne’e..
“Korreaun ne’e halo ona rejime espesiál ba sub rejime oportunidade ne’ebé fó oportunidade ba alin estudante sira-ne’ebé akaba ona sira nia estudu iha tinan haat liu ba. inklui fó oportunidade ba sub rejime espesiál ba veteranu no antigu kombatente libertasaun nasionál no mós sub rejime espesiál ba bolsa hakbii,” Governante ne’e hateten ba jornalista sira salaun enkontru MESSK, Colmera.
Hosi rejime espesiál ba sub rejime tolu ne’e rasik, tuir esplikasaun Ministru Longuinhos nian katak totál kandidatu ne’ebé maka konsege kandidata sira nian-an no rejistu ho totál hamutuk estudante hamutuk 3.470.
Maibé hosi totál númeru ida-ne’e kuaze kandidatu ne’ebé mak tuir ezame rejime espesiál iha de’it 3.065 ekivalente ba 88,3%, nune’e kandidatu ne’ebé la konsege tuir ezame rejime espesiál ne’e kuaze na’in 405 ekivalénsia ba 11,7%.
“Hosi númeru ne’e, ha’u temi ne’ebé tuir ezame hamutuk 3.065 ne’e ita kategoriza ba rejime espesiál ba oportunidade iha na’in 1.586 reprezenta 51,7%. Rejime espesiál ba veteranu no antigu kombatente libertasaun nasionál iha 370 reprezenta 12% no mós ba rejime espesiál bolsa hakbiit nian iha total estudante hamutuk 1.94 reprezenta 35,7%,” nia dehan.
Hosi totál rejime espesiál ho ninia sub rejime tolu ne’ebé mensiona, MESSK mós iha tan rejime espesiál sira seluk ne’ebé mak Ministériu Ensinu Superiór Siénsia no Kultura (MESSK) konsidera mak hanesan sub rejime espesiál ba idade 23. \
Sub rejime espesiál ba estudante Timoroan ne’ebé mak finaliza sira-nia ensinu sekundáriu iha rai li’ur, no sira-ne’e hamutuk 15 ekivalénsia ba 0,6%, mak partisipa hotu iha ezame rejime espesiál ne’ebé foin realiza daudaun ne’e.
Kandidatu rejime espesiál ne’e rasik kategoriza ba kada munisípiu no tuir dadus ne’ebé hatudu katak munisípiu Dili mak ninia kandidatu rejime espesiál aas liu ho totál kandidatu hamutuk na’in-746, tuir Rejiaun Administrativu Espesiál Oé-Cusse Ambeno (RAEOA) hamutuk na’in-344, Bobonaru 335, Viqueque 89 no menus liu mak Ataóro nu’udar munisípiu foun ho totál kandidatu hamutuk na’in-49.
Enkuantu estudante hamutuk 3.065 ne’ebé tuir ona ezame rejime espesiál ne’e foin mak kandidatu seidauk definitivu.
Purtantu, prosesu korresaun pontu ezame rejime espesiál nian ne’e, ohin hahú ona no tuir kalendáriu hosi kronograma ne’ebé iha sei finaliza iha fulan fevereiru tinan ne’e. no valór ne’ebé atu termina estudante ida sei pasa iha rejime espesiál ne’e mínimu tenke atinje 50.
Tanba ne’e mak, ohin MESSK realiza ona serimónia lansamentu ezame korresaun ba asesu engresu tinan akadémiku 2023 atu asesu ba Instituisaun Ensinu Superior Públiu liu-liu ba rejime espesiál.
Hosi serimónia lansamentu ne’e Ministériu Ensinu Superior Siénsia no Kultura konvida mós entidade relevante sira hanesan Ministériu Edukasaun Juventude no Desportu, Ministériu Solidariedade Sosiál no Mós Ministériu Administrasaun Estatál atu hamutuk bele haree ninia rezultadu tuir mai.
Jornalista : Tomé Amado
Editór : Cancio Ximenes
