OMS apoiu mákina x-ray lima ba MS uza deteta ba TB
DILI,10 janeiru 2022 (TATOLI) – Organizasaun Mundiál Saúde (OMS) apoiu mákina x-ray lima maibé tolu mak entrega ona ba Ministériu Saúde (MS) no rua sei iha dalan. Mákina ida ne´e uza hodi deteta ba moras tuberkoloze iha munisípiu tolu.
Reprezentante Organizasaun Mundiál Saúde iha Timor Leste, Arvind Mathur, hateten fasilidade hirak ne´e bele ajuda profissional saúde atu servi povu di´ak liután hodi elimina TB iha tinan 2025.
“Mákina x -ray ida ne’e atu ajuda populasaun Timor-Leste sira ne’ebé mak moras tuberkuloze hodi deteta sedu, tanba ne’e profisionál saúde sira uza mákina ida ne’e ho kuidadu”, Arvind Mathur, hateten liuhosi diskursu, iha Hotel Novo Turismo, ohin.
Iha fatin hanesan, Diretora Jerál Prestasaun Saúde iha Ministériu Saúde, Odete da Silva Viegas, informa OMS apoiu mákina X-ray lima maibé tolu mak iha ne’e, rua sei iha dalan.
“Mákina tuberkoloze nian ne’ebé hetan apoiu husi Organizasaun Mundiál Saúde iha Timor Leste ba X-ray portable lima maibé tolu mak ohin sira fó ona no rua mak sei iha dalan, entaun ekipamentu sira ne’e hodi deteta ba moras tuberkoloze sira iha ita nia-rain”, katak.
Nia dehan X-ray ida ne’e atu distrubui ba Munisípiu tolu hanesan Viqueque, Manufahi no Ermera tanba munisípiu sira ne’e mak iha komitmentu ona fó sai katak atu elemina tuberkoloze iha 2025.
“Ita-nia problema durante ne’e mak servisu ida ne’ebé mak atu haree ba apoiu diagnóstiku hanesan facilidade medikál sira ne’e, ha’u husu ba profisionál saúde sira iha baze liuliu ba tékniku sira ne’ebé mak responsabiliza ida ne’e, tenke kuidadu sasan sira, tanba mákina ne’e la presiza eletrisidade maibé mákina ne’e manutensaun ne’ebé jutisfikadu bainhira hasai x-ray no rona kedas nia rezultadu”, informa.
Atribuisaun mákina x-ray ne´e liuhosi formasaun ba profissionál saúde iha Hotel Novo Turismo. Iha atividade formativa uza mós mákina atu halo prátika óinsa bele uza mákina atu deteta pasiente tuberkuloze.
Jornalista : Felicidade Ximenes
Editór : Zezito Silva
