12 Janeiru : Labarik hamutuk 865.024 simu vasina
DILI, 11 janeiru 2023 (TATOLI) – Ministériu Saúde halo kampaña vasinasaun ba PCV, Oral Pollio Vacine (OPV), Rubella sarampo, vitamina A no Albendazole ba labarik tinan lima mai kraik hamutuk 865.024 iha Timor-Leste, vasina hahú iha 12 janeiru.
“Labarik sira ne’ebé mak atu simu vasina iha loron 12 fulan janeiru tinan ne’e iha teritóriu nasionál tuir alvu ne’ebé mak define ona hanesan husi labarik tinan 0 to´o lima, simu vasina OPV hamutuk 188.125, labarik semana neen to´o tinan lima simu vasina PCV hamutuk 184.146, labarik fulan sia to´o tinan lima simu vasina rubella no sarampo 164.251, labarik fulan neen to´o tinan lima simu vitamina A hamutuk 172.209 no labarik tinan ida to´o tinan lima simu albendazole hamutuk 156.293”, Diretór Nasionál Saúde Publika iha MS Frederico Bosco, dehan ba TATOLI.
Nia dehan iha alvu ba kampaña katak labarik idade 0 to´o lima sei simu vasina OPV la haree ba sira nia estadu vasinasaun uluk nian. Labarik fulan sia to´o tinan lima sei simu vasina sarampo no rubella la haree ba sira nia estadu vasinasaun uluk nian. Labarik semana 6 to´o tinan lima sei simu doze ba vasina PCV durante kampaña, labarik sira ne’ebé la simu vitamina A iha fulan haat ikus no mós labarik sira ne’ebé la simu albendazole iha fulan haat ikus.
Nune’e Ministra Saúde, Odete Maria Freitas Belo, informa kampaña vasinasaun ida ne’e importante tanba depois Covid-19, MS halo levantamentu no halo estudu hatudu katak labarik sira nia imunidade hasoru moras sarampo ne’e kiik tebes.
“Ita nia kobertura ba vasinasaun ba labarik sira durante ne’e kiik tebes iha situasaun Covid-19 nia-laran, entaun ho labarik sira nia imunidade kiik. Agora haree ba levantamentu ne’ebé mak iha MS hamutuk ho Organizasaun Mundiál Saúde no NITAG ne’ebé planeia ba kampaña ba labarik sira husi idade tinan lima mai kraik iha territóriu nasionál”, Odete Belo informa.
Ministra Saúde apela ba populasaun liuliu inan aman sira ne’ebé iha oan tinan lima mai kraik bele lori oan sira mai simu vasina iha fasilidade saúde hodi kontinua forte tanba moras sarampo la´os katar de´it iha isin maibé sei afeta mós ba labarik sira nia pulmaun hanesan mear dada iis no bele mate iha tempu ne’ebé de´it no afeta mós ba labarik sira nia matan sai aat.
Jornalista : Felicidade Ximenes
Editór : Zezito Silva
