Japaun apoia Timor-Leste ho mákina teste Covid-19 tolu
DILI, 11 janeiru 2023 (TATOLI ) – Governu Japaun liuhosi Ajénsia Kooperasaun Internasionál Japaun (JICA) apoiu Timor-Leste ho mákina teste Covid-19 ho unidade tolu.
“Suporta ida ne’e atu haree liu ba hasae kapasidade Laboratóriu Nasionál Saúde no mós Laboratóriu ida iha Universidade Nasionál Timor-Leste (UNTL) ho objetivu atu tulun foinsa’e sira atu hatene liután servisu saúde nian”, Embaixadór Japaun iha Timor-Leste, Kimura Tetsuya, hateten ba jornalista sira bainhira atribui mákina iha salaun MS, Caicoli, ohin.
Nia esplika tuir polítika Governu Japaun katak preszia fó tulun ba nasaun sira ne’ebé iha situasaun vulnerável liuliu parte saúde nian.
Kimura Tetsuya, dehan mákina teste ida ne´e ho kustu rihun atus ida tolu nulu.
Iha fatin hanesan, Ministra Saúde, Odete Maria Freitas Belo, agradese ba Governu Japaun liuhosi JICA tanba mákina teste Covid-19 bele ajuda liután servisu saúde nian iha Timor-Leste.
“Sira nia apoiu mai ita ne’e la´os agora kedas maibé ita prepara proposta iha tinan 2021 bainhira kazu Covid-19 ne’e iha”, relembra.
Nia afirma ho apoiu Governu Japaun nian, Laboratóriu Nasionál Saúde hetan mákina rua no mákina ida ba Laboratóriu UNTL. Mákina hirka ne´e bele teste Covid-19 no mós teste ba moras sira seluk mikrobilojia nian, hanesan tuberkoloze, HIV-SIDA no mós teste ba moras sira seluk.
Jornalista : Felicidade Ximenes
Editór : Zezito Silva
