iklan

EKONOMIA, DILI, HEADLINE

SEFOPE prepara tan joven na’in-49 atu ba servisu iha Austrália

SEFOPE prepara tan joven na’in-49 atu ba servisu iha Austrália

Diretór Nasionál Empregu Exteriór SEFOPE, Filomeno Soares. Imajen Tatoli/Egas Cristóvão

DILI, 11 Janeiru 2023 (TATOLI) – Sekretária Estadu Formasaun Profisionál no Empregu (SEFOPE) liuhosi Diresaun Nasionál Empregu Exteriór (DNEE) realiza Pre-Departure Breafing (PDB) ba kandidatu traballadór na’in-49 kompostu hosi mane 21 no feto 28 ne’ebé atu ba servisu iha Austrália.

“Realizasaun programa PDB ba kandidatu traballadór sira bazea ba kritéria ne’ebé empregadór hosi Austrália fó no faze ida ne’e atu hanorin traballadór sira kona-ba, lei, kultura no disiplina servisu iha Austrália”, dehan Diretór Nasionál Empregu Exteriór, Filomeno Soares, ba jornalista sira iha, Becora, ohin.

Dirijente ne’e husu ba joven na’in 49 ne’ebé hetan ona oportunidade atu ba servisu iha Austrália, hatudu komportamentu servisu ne’ebé di’ak, respeita ema nia lei no mantein servisu iha sistema, hodi nune’e bele hetan konfiansa nafatin husi empregadór atu bele emprtega tán ita nia joven timor-oan sira.

“Ba servisu halai sees husi sistema sei tau ita nia aan ba risku tanbá halai sees ona hosi sistema empregadór sira iha Austrália konsidera ita hanesan traballadór lokál, la’os ona hanesan traballadór imigrante, nune’e ita hasoru problema ruma Governu la iha ona responsabilidade atu rezolve”, nia dehan.

Diretór ne’e mós apela ba joven timor-oan hotu ne’ebé hetan oportunidade ba servisu iha Austrália, atu labele pratika fila-fali artemarsiál no arterituál iha ema nia rain tanbá ba servisu la’os hanesan pesoál, maibé reprezenta nasaun no povu Timor-Leste.

Tuir dadus tinan kotuk to’o mai ohin loron timoroan ne’ebé servisu iha Austrália hamutuk na’in 2,821, hosi númeru ne’e balun servisu iha agrikultura no ortikultura hanesan kú ai-fuan, modo no seluk tan.

Jornalista:Hortencio Sanchez

Editór : Zezito Silva

iklan
iklan

2 Comments

Leave a Reply

iklan
error: Content is protected !!