DILI, 10 janeiru 2023 (TATOLI) – Polísia Nasionál Timor-Leste (PNTL) liuhosi Servisu Intvestigasaun Kriminál kaptura ona suspeitu ho inisiál OCX (22) ne’ebé sona vítima Damazio Correia iha área Ponte BJ Habibie hafoin persege no hetan iha Munisipiu Manufahi.
Asaun kaptura ne´e akontese tanba servisu intelijénsia polisiál informa ba Departementu Investigasaun Kriminál Komandu Jerál PNTL iha loron (10/1) loraik ne’e, entaun ekipa dezloka kedan ba Manufahi hodi bá foti suspeitu iha Suku Welaluhu, Postu Administrativu Fatuberliu, Munisipiu Manufahi.
Hafoin kaptura suspeitu, Ekipa Investigasaun Kriminál transporta kedan suspeitu mai Dili. Iha tuku 21:00, ekipa investigasaun submete suspeitu ba prosesu identifikasaun durante oras 12.
Perante identifikasaun parte Departamentu Investigasaun Kriminál la autoriza ema ruma atu publika suspeitu OCX nia foto tanba sei submete ba prosesu investigasaun.
“Kazu ne’e sei iha hela prosesu, ita akompaña de’it, husik polísia halo nia serbisu, ita hotu fó apoiu ba sira”, Portavós Komandu Jerál PNTL, Superintendente Polísia, Xefe Arnaldo Araujo, ba TATOLI via telefóne, tersa ne’e.
Rekorda vítima Damazio Correia hetan sona hosi ema deskoñesidu iha tuku 21:00 área ponte BJ Habibie, Suku Bidau Lecidere, Postu Administrativu Cristo Rei, hosi akontesimetu ne’e vítima hetan sofre makas iha kotuk laran tanba tudik belit iha isin.
Jornalista: Natalino Costa
Editór : Zezito Silva
