DILI, 12 janeiru 2023 (TATOLI)–Diretór Nasionál Dezenvolvimentu Parque Eskolár (DNDPE), Agostinho Soares, relata projetu kapitál dezenvolvimentu hamutuk 20 hosi Ministériu Edukasaun Juventude no Desportu (MEJD) nian ne’ebé liuhosi prosesu konkursu públiku ne’e iha projetu hitu mak konklui ona.
“Projetu kapitál dezenvolvimentu ne’e hotu-hotu liuhosi konkursu públiku ne’ebé ita iha projetu 20 no agora kuaze projetu hitu mak konklui ona, agora sei falta projetu hamutuk 13 mak sei iha hela prosesu konstrusaun fíziku,” Diretór ne’e hateten ba Agência Tatoli iha Gabinete Dirasaun Parque Eskolár Ministériu Edukasaun Juventude no Desportu Vila Verde, kinta ne’e.
Tuir planu metade projetu kapitál dezenvolvimentu hamutuk 13 ne’e sei konklui iha marsu nia klaran, tanba agora daudaun kuaze progresu fíziku ba projetu 13 ne’e atinje ona 50%.
Nune’e, DNDPE halo ona notifikasaun ba projetu hirak ne’e atu nune’e iha primeiru trimester tinan ida-ne’e nia rohan ka inísiu hosi segundu trimestre tenke konklui ona.
Hosi projetu hitu ne’ebé hatudu ona ninia progresu ne’e mak hanesan eskola Ensinu Báziku terseiru siklu ida, ensinu sekundáriu jerál ida no eskola Tékniku Vokasionál lima, eskola sira-ne’e lokaliza iha munisípiu lima Aileu Covalima, Dili, Lospalos no Ermera.
Hosi Aileu konstrusaun ba eskola ensinu sekundáriu tékniku vokasionál ida, Covalima projetu konstrusaun ida ba eskola ensinu sekundáriu tékniku vokasionál Akar Laran, Dili projetu Konstrusaun ida ba edifísiu eskola ensinu báziku sentrál Sergio Vieira de Melo Becora ne’ebé inaugura ona iha tinan kotuk.
Nune’e mós, hosi bens servisu nian projetu konstrusaun iha Lospalos ba Eskola rua mak hanesan eskola Ensinu Sekundáriu Tékniku Vokasionál Lai-Iku no Eskola Ensinu Sekundáriu Tékniku Vokasionál Lautém no hosi Ermera konstrusaun ba eskola ida iha ensinu sekundáriu jerál Cesar Maulaka “Maukruma”.
Tuir planu, Ministériu Edukasaun Juventude no Desportu nian iha 2022 ne’e prosesu konstrusaun ba nivel ensinu sekundáriu nian eskola TEKVOK mak maioria iha territóriu nasionál, tanba prioridade governu nian oinsá atu projeta kompeténsia no abilidade estudante sira-nian hodi responde ba kampu de traballu.
Tanba ne’e, nia hateten, MEJD tau prioridade hodi instala infraestrutura edukativa ba tékniku vokasionál iha territóriu nasionál.
Jornalista : Tomé Amado
Editór : Cancio Ximenes
