BAUCAU, 12 janeiru 2023 (TATOLI) – Governu liuhosi Ministériu Saúde (MS) kinta ne’e, lansa kampaña nasionál imunizasaun integrada iha área Caisido, suku Tirilolo, postu administrativu Baucau Vila, munisípiu Baucau.
Kampaña nasionál integradu imunizazaun rútina ne’e komposta hosi introdusaun vasina PCV, vitamina A, ai-moruk kontra lumbringa no vasina Covid-19 ne’ebé hetan apoia hosi Organizasaun Munidiál Saúde (OMS), UNICEF, USAID no DIFAT.
Vise-ministru saúde, Bonifácio Maucoli dos Reis, esplika, programa refere lansa iha fatin rua hanesan Baucau no munisípiu Bobonaro, ne’ebé hala’o hosi Ministra Saúde, Odete Belo nune’e oan ho idade hosi zero anu too tinan-lima partisipa másima iha kampaña nasionál ne’e.
“Sei hasa’e imunidade ba labarik sira, maibé iha efeitu isin manas, kuandu akontese hanesan ne’e sei fó ai-moruk sei halakon isin manas,” Vise ministru saúde hateten iha Caisido, kinta ne’e.
Tuir tarjeitu iha munisípiu Baucau hamutuk rihun 12.500-resin no nasional purvolta rihun na’in-180 resin ba labarik idade zero to’o tinan-lima.
Ministériu Saúde promete sei finaliza kampaña nasionál refere no sei kontinua to’o tarjetu bainhira seidauk atinje iha loron determinadu.
Governante ne’e argumenta, objetivu hosi vasina refere atu proteje saúde Timor-oan hotu hosi ameasa moras oinoin tuir objetivu dezenvolmemtu sustentável katak labele husik ema seluk iha kotuk hanesan fó atensaun ba área hotu-hotu inklui saúde.
“Ministériu Saúde sei fó atensaun ba sidadaun hotu, la haree ba rasa no relijiaun maibé inportante bele moris ho kondisaun ne’ebé saudável,” Bonifácio dos Reis akresenta.
Pneumococol (PVC) nia sintomas mak inus-been, isin manas no me’ar, kauza hosi batéria pneumonia, afeta liu ba labarik no katuas-ferik sira, insidénsia moras aas liu ba labarik sira menus hosi tinan-rua ne’ebé sei hamosu moras hanesan meningitis, brochities, septicaemia, otitis media, septic no sinusitis.
Kauza hosi sarampu hosi virus, hada’et hosi anin liuhosi me’ar, nia síntoma ulun malirin, isin-manas no kulit-katar.
Rubela hada’et liuhosi anin, me’ar ka fanin hosi pesoál infetadu ne’ebé perigu ba inan isin rua tanba bele afeta ba bebé. Enkuantu póliu da’et hosi dalan liur-boot-oral liuhosi hahaan no bee ne’ebé kontaminadu.
MS planeia fó vitamina A, ai-moruk kontra lumbringa ba labarik idade fulan-neen too tinan-lima no kontinua hala’o vasina kontra Covid-19 iha kampaña integradu ne’e, ne’ebé tuir planu sei finaliza iha loron-28 fevereiru tinan ne’e.
Notísia relevante: MS lansa imunizasaun integrada iha Bobonaro
Jornalista : Natalino Belo
Editór : Evaristo Soares Martins
