PM no WFP diskute seguransa alimentár
DILI, 12 janeiru 2023 (TATOLI) – Reprezentante Programa Ai-han Mundiál (WFP, sigla ingles), iha Timor-Leste, Alba Cecília Garzon Olivares, hasoru malu ho Primeiru-Ministru, Taur Matan Ruak hodi diskute kona-ba seguransa alimentar.
“Ohin ha’u hasoru malu ho Primeiru-Ministru hodi koalia kona-ba seguransa ai-han tanba iha Timor-Leste 47% mak hetan má-nutrisaun”, Alba Cecília Garzon Olivares, ba jornalista-sira iha Palásiu Governu hafoin remata sorumutuk ho Xefe Governu.
Nia dehan Xefe Governu konkorda atu tur hamutuk tan ho WFP hodi diskute klean kona-ba seguransa ai-han, nune’e bele kombate má-nutrisaun iha Timor-Leste.
Nia esplika, Timor-Leste atinje 47% populasaun má-nutrisaun tanba família kbiit-laek barak no rendimentu menus hodi sosa ai-han nutritivu hodi konsumu.
WFP sei hahú programa iha janeiru ne’e nu’udar liña foun ba ajenda governamentál foun ho baze orsamentu foun no sente kontente atu suporta Governu Timor-Leste ho kapasidade tékniku sira, programa ne’e sei hala´o durante tinan tolu, hahú 2023 to’o 2025.
Programa WFP nian foka liu ba alimentasaun no nutrisaun atu kombate má-nutrisaun iha Timor-Leste. Totál orsamentu atu implementa ba programa sira ne e seidauk hatene loos ninia montante.
Rekorda WFP apoia ona ai-han ba inan sin-rua iha munisípiu neen, hanesan Baucau, Covalima, Ermera, Dili, Manatuto no Manufahi, apoiu hirak ne’e hanesan al-han pakote foos tonelada 1 594 koto tonelada 213 no mina ho tonelada 106 ba fulan tolu nian no distribui hotu ona ba munisípiu neen.
Jornalista:Hortencio Sanchez
Editór : Zezito Silva
