2022: SM kontribui reseita ba kofre Estadu hamutuk $1.497,540.00

DILI, 12 janeiru 2023 (TATOLI) – Diretór Jerál Servisu Migrasaun, Ministériu Interiór, Asistente Superintendente Polísia, Luis Soares Barreto, informa iha 2022, SM kontribui reseita ba kofre Estadu hamutuk $1.497,540.00.
“Reseita sira ne’e mai hosi prolongasaun viza ba ema sidadaun sira ne’ebé tama iha teritóriu nasionál hamutuk $81.890.00 no aplikasaun koima ba sidadaun estranjeira ne’ebé uza sala vistu ba halo fali atividade negósiu iha ita nia rai hamutuk $1.415.650.00 ho nune’e reseita ne’ebé durante 2022 hosi SM kontribui ba kofre Estadu hamutuk $1.497,540.00”, Diretór Jerál Serbisu Migrasaun, Ministériu Interiór, Asistente Superintendente Polísia, Luis Soares Barreto, ba jornalista sira iha nia kna’ar fatin, Caicoli, kinta ne’e.
Luis subliña, bazea ba dadus hosi reseita SM kontribui ba kofre Estadu kompara ho tinan sira kontuk ne’e sempre la hanesan, iha tuun no sae.
Iha 2018 SM kontribui reseita ba Estadu prolongasaun viza ba ema sidadaun sira ne’ebé tama iha teritóriu nasionál hamutuk $3.218.590 no aplikasaun koima ba sidadaun estranjeira ne’ebé uza sala vistu ba halo fali atividade negósiu iha ita nia rai hamutuk $221.860.00, durante 2018 hosi Servisu Imigrasaun kontribui ba kofre Estadu hamutuk $ 3.440.450.00.
Iha 2019 SM kontribui reseita ba Estadu prolongasaun viza ba ema sidadaun sira ne’ebé tama iha territóriu nasionál hamutuk $ 2,984.785.00 no aplikasaun koima ba sidadaun estranjeira ne’ebé uza sala vistu ba halo fali atividade negósiu iha ita-nia rai hamutuk $ 139.520.00 hosi totál ne’e iha 2019 SM kontribui reseita ba Estadu $3.124.,305.00.
Iha 2020 SM kontribui reseita ba Estadu prolongasaun viza ba ema sidadaun sira ne’ebé tama iha teritóriu nasionál hamutuk $919.340.00 no aplikasaun koima ba sidadaun estranjeira ne’ebé uza sala vistu ba halo fali atividade negósiu iha ita nia rai hamutuk $ 174.950.00 hosi totál ne’e iha 2019 $3.124.305.00, SM kontribui reseita ba Estadu hamutuk 1.094.290.00.
Iha 2021 SM kontribui reseita ba Estadu prolongasaun viza ba ema sidadaun sira ne’ebé tama iha territóriu nasionál hamutuk $ 750.840.00 no aplikasaun koima ba sidadaun estranjeira ne’ebé uza sala vistu ba halo fali atividade negósiu iha ita nia rai hamutuk $ 114.270.00, hosi totál ne’e iha 2019 $3.124.,305.00, SM kontribui reseita ba Estadu hamutuk 865.110.00.
Nia esplika, durante 2020 no 2021 reseita SM tún tanba kauza hosi pandemia Covid-19 fronteira terrestre no aero no marítima taka ema la tama sai iha teritóriu nasionál, no kauza rezolusaun parlamentu nasionál lei númeru 11/2017, Misionáriu Katólika padre tantu madre tama mai Timor-Leste ho gratuita no prolongasaun viza mós gratuita, inklui rezolusaun Governu iha númeru 25/2019 fó toleransa ba sidadaun Indonézia tama gratuita la selu vistu no prolongasaun viza mós la selu.
“Ha’u hanoin ho kestaun sira ne’e maka afeta bo’ot tebes ba ita nian reseitas ne’e tún”, konklui.
Jornalista: Natalino Costa
Editór : Zezito Silva

