DILI, 13 janeiru 2023 (TATOLI) – Primeiru-Ministru, Taur Matan Ruak, preokupa ho konstrusaun edifísiu Tribunál Primeira Instánsia Dili ne’ebé mak la´o atrazu tebes.
“Agora ha’u mai fó boas entradas ba Prezidente Tribunál Rekursu no hato’o mós asuntu rua importante, ida mak obra Tribunál Primeiru Instánsia Dili ne’ebé daudaun ne’e demora oituan, tanba ne’e ha’u hakarak mai iha ne’e hodi hatene, asuntu daruak mak dezeñu konstrusaun edifísiu Supremu Tribunál Justisa”, Taur Matan Ruak, dehan ba jornalista sira hafoin hasoru malu ho Prezidente Tribunál Rekursu, Deolindo do Santos, iha nia kna’ar fatin Caicoli, sesta ne’e.
Tuir nia, aleinde ne´e mós parte rua koalia kona-ba konstrusaun obra ba edifísiu Supremu Tribunál ba Justisa ne’ebé daudaun ne’e hahú prepara ona dezeñu, entaun ida ne´e importante atu hatene.
Iha fatin hanesan, Prezidente Tribunál Rekursu, Deolindo dos Santos, afirma, vizita Primeiru-Ministru, Taur Matan Ruak nian mai edifísiu Tribunál Rekursu, atu husu progresu ba konstrusaun edifísiu Tribunál Primeiru Instánsia Dili ne’ebé atrazu.
“Primeiru-Ministru, Taur Matan Ruak, ohin mai iha ne’e ho objetivu rua ida mak atu hatene kona-ba prosesu konstrusaun Tribunal Distritál Dili ne’ebé maka la´o hela, maibé sei paradu hela, entaun nia hakarak buka hatene tanba saida maka buat sira ne’e sai hanesan ne’e”, nia salienta.
Hatan ba konstrusaun obra ne´ebé atrazu, Deolindo esplika tuir loloos empreza kontratór konklui ona obra ne’e iha tinan kotuk maibé situasaun pandemia entaun la konsege.
Haree ba situsaun ne’e, Prezidente Tribunál Rekursu haruka ona karta ba empreza konstratór no fiskalizadór ba projeitu ne’e atu aselera obra ne’e.
Deolindo husu ba empreza labele atraza tán konstrusaun obra ne’e tanba kuandu konstrusaun ne’e kle’ur Estadu lakon tebes.
Nia informa ba Xefe Governu, Taur Matan Ruak, katak konstrusaun edifísiu Tribunál Primeira Instánsia ne’ebé sei instala iha munisípiu hotu inklui kontrusaun edifísiu sira ba Juiz sira iha munisípiu hotu.
Tuir lei organizasaun judisiária foun ezije tenke instala Tribunál Primeiru iha munisípiu hotu inklui no rezidénsia ba Juiz sira.
“Tanba ne’e, iha tinan ne’e, ami hanoin atu hahú instala Tribunál Primeiru Instánsia iha munisípiu tolu, hanesan Viqueque, Ermera no Bobonaro, inklui rezidénsia ba Juiz sira”, Prezidente Tribunál Rekursu afirma.
“Ba ida ne’e nia dezeñu ita prepara no konstrusaun ba edifísiu sira ne’e ho forma ida de’it, agora ami koordena ona ho ADN no CNA atu haree ba kestaun ne’e”, Deolindo konklui
Deolindo atualiza mós Tribunál nia disponibilidade hodi apoia Governu no Parlamentu Nasionál hodi haree ba lejislasaun sira, liuliu lei organizasaun judisiária ninia implementasaun iha futuru.
Edifisíu TDD foun ne’e konstrui ho medida andár-rua sei kompleta sala audiénsia julgamentu, sala ba serbisu ofisiál justisa, juis, prokuradór, defensór, advogadu no ba sidadaun-sira ne’ebé asesu ba justisa ho espasu dignu. Tuir kontratu, kontrusaun obra ne´e hahú iha 2020 no entrega iha 2021.
Konstrusaun ba edifísiu foun TDD lansa fatuk-inan iha 25 novembru 2020, ne’ebé hetan supervizaun konsultóriu hosi kompañia Dacrea In Association with AEC no kontratór hosi kompañia Xina Shadong International Economic and Technical Cooperation Group.R.P. ho valór projetu $10.990.769,35.
Jornalista: Natalino Costa
Editór : Zezito Silva
