MS implementa ona vasina da-haat ba grupu vunerável sira
DILI, 14 janeiru 2023 (TATOLI) – Ministra Saúde, Odete Maria Freitas Belo, dehan Ministériu Saúde (MS) implementa ona vasina da-haat ba grupu vulnerável sira atu hasae imunidade hodi kontra moras Covid-19.
“Doze da-haat ami implementa hela iha fasilidade saúde sira, maibé ami fó prioridade ba profisionál saúde, hanesan ita boot sira media ne’ebé mak kontatu besik ho ema no ba ema vulnerável sira. atu simu vasina ida ne’e hodi kontra moras sira”, Ministra Saúde, Odete Maria Freitas Belo, hateten iha Comoro, ohin.
Governante ne’e husu ba ema sira ne’ebé mak hakarak atu simu vasina da-haat, MS prontu atu fó vasina iha fasilidade saúde sira.
“Vasina da-haat nia persentajen sei kiik tanba ida da-toluk de´it foin atinje 30 % maibé se karik ema ne’ebé hakarak atu simu vasina bele ba fasilidade saúde ne’ebé mak besik hodi simu vasina sira ne’e”, Odete informa.
“Ita nafatin vasina Ccovi-19 iha fasilidade saúde sira, agora daudaun ita aumenta ho vasina imunizasaun rutina B labarik kiik sira, entaun ida ne’e ajuda tebes imunidade ema nia hodi hadook an hosi moras sira”, hakotu nia.
Jornalista : Felicidade Ximenes
Editór : Zezito Silva
