Top

Família husu PCIC aselera kazu matebian José Bernardo iha sela polísia

Famïlia Matebian, José Bernardo, ne'ebé mate iha sela Komandu PNTL Kaikoli husu prosesu investigasaun ba PCIC, iha edifísiu PCIC, segunda (16/01). Imajen Tatoli/Francisco Sony

DILI, 16 janeiru 2023 (TATOLI) – Família vítima hosi matebian José Bernardo kontinua ejize ba Polísia Siéntifika Investigasaun Kriminál (PCIC, sigla portugés) atu aselera prosesu investigasaun ba kazu matebian José Bernardo ne’ebé mate iha sela Komandu Polísia Nasionál Timor-Leste (PNTL), Munisípiu Díli ho kondisaun fiu eletrisidade iha kakorok.

Inan hosi Matebian José Bernardino, Regina de Jesus  Soares, hateten prezensa família sira iha edifisiu PCIC, atu buka lia los ba Jose Bernado nia mate, tanba kazu  ne’e kle’ur los ona no laiha iha serteza.

“Ha’u mai iha ne’e, hakarak atu ejize ba PCIC atu aselera prosesu investigasaun ba kazu ha’u nia oan nia mate,  hodi fó rezultadu lalais ba ami família kona-ba ami nia oan nia mate”, Regina de Jesus  Soares, ba jornalista sira hafoin hasoru malu ho dirijente PCIC, iha edifísiu PCIC Caicoli, segunda ne’e.

Nia dehan hanesan inan no família sente triste tanba to’o ohin loron justisa laiha ba José Bernardo nia mate iha sela polísia, nia la´os mate iha liur, la´os mate ih aestrada, ida ne´e mak parte sira tenke hatur lolos lia los.

“Ha´u nia oan ne’e mate kle’ur los ona atu tama ona fulan lima ona, ha’u husu de’it justisa ba ha’u nia oan nia mate ne’ e, tanba ha’u nia oan nia mate hanesan animál sem justisa, ne’e mak ha’u lakohi, ha’u hakarak buka lia los ba ha’u nia oan mate”, katak.

“Ema ho ema maka hein malu iha sela mak to’o ha’u nia oan mate iha sela tanba ne’e maka ha’u husu aselera prosesu ida ne’e, hodi  bele fó serteza ba ami família”, nia afirma

Iha fatin hanesan  investigadór PCIC, Floriano  Serano, hateten kazu matebian José Bernardo nian ne’e prosesu investigasaun seidauk hotu.

“Husu ba família katak kazu matebian José Bernardo nian ne’e sei iha hela prosesu investigasaun“, nia konklui.

Matebian José Bernardo mate iha sela detensaun Komandu Polísia Nasionál Timor-Leste (PNTL) Munisípiu Díli iha (1/9/2022) iha tuku 19:00 kalan, ne’ebé  ho kondisaun fiu eletrisidade iha kakorok.

Jornalista: Natalino Costa

Editór : Zezito Silva

 

Publisidade

Leave a Reply

Latest Post

error: Content is protected !!