DILI, 16 janeiru 2023 (TATOLI)–Diretór Administrasaun no Jestaun Finansa Ministériu Edukasaun Juventude no Desportu (DJAF-MEJD), Atoninho Pires, informa prosesu estudu viabilidade atu harii eskola própriu ba profesór sira sei konklui iha tinan ida-ne’e.
“Ita-nia planu halo estudu viabilidade kona-ba planu implementasaun eskola de exelente ka eskola própriu ba profesór sira-ne’e ho intensaun atu iha futuru bele prodús profesór sira-ne’ebé iha kualidade hahú kedan hosi baze,” Antoinho Pires hateten ba Agência Tatoli iha ninia servisu fatin, Vila Verde, segunda ne’e.
Timor-Leste iha ona Instituisaun Ensinu Superior Públiku no Privadu sira mak instala ona kursu edukasaun maibé Ministériu Edukasaun hakarak harii mós eskola ida própriu duni atu haree oinsá atu halo preparasaun ida di’ak ba profesór sira.
Tuir nia, kursu edukasaun ne’ebé mak estabelese iha kada universidade ka Instituisaun públiku no privadu ne’e jerál de’it, tanba ne’e mak MEJD hakarak harii eskola ida própriu duni ba profesór sira.
Tamba ne’e, bainhira eskola exelente ka eskola própriu ne’e mak instala duni, MEJD sei fó prioridade ba profesór selesionadu sira-ne’ebé tama iha eskola de exelente ne’e prepara duni atu sai profesór.
“Bainhira ita-nia profesór sira akaba ona hosi eskola exelente ne’e sira preparadu duni atu hanorin hosi nivel edukasaun Pre-eskolár ensinu báziku ba to’o iha nivel ensinu sekundáriu jerál no tékniku vokasionál,” nia hateten.
Estudu viabilidade ne’ebé MEJD hala’o ne’e. Governu prevee orsamentu rihun $250 hodi realiza estudu iha territóriu nasionál.
Agora daudaun, nia dehan, MEJD konsege prodús ona esbosu preliminaria ida no rezultadu sira akontesimentu, tanba antes ne’e péritu sira halo ona komunikasaun ho parte ne’ebé iha koñesimentu ba informasaun no dadus hodi tulun sira bele halo analiza.
Nune’e, Ministériu Edukasaun Juventude no Desportu (MEJD) nia esperansa iha 2023 iha primeiru trimestral ne’e bele hatudu ona ninia rezultadu, atu nune’e ba oin bele iha ona desizaun ruma kona ba instalasaun eskola de exelente ne’e.
Jornalista : Tomé Amado
Editór : Cancio Ximenes
