BAUCAU, 17 janeiru 2023 (TATOLI) – Servisu Munisipál Edukasaun Baucau, tersa ne’e realiza misa agradesimentu hodi abertura ensinu aprendizahen tinan letivu 2023 iha Katedrál, Vila Antiga, Baucau.
Administradór Diosezanu Dioseze Baucau, Padre Alípio Pinto Gusmão, esplika, nu’udar ema umanu ne’ebé matenek, hatene moris tuir Maromak nia ukun fuan no presiza rona barak.
“Edukasaun Timor nian iha polítika la esklui ema hosi edukasaun katak eskola sira hotu tenke prontu simu ema hotu-hotu neebe hakarak eskola, akompaña no transforma sira sai fali ema di’ak, ida-nee mak dehan eskola iha kualidade,” Administradór Dioseze Baucau hateten iha Igreja Katedrál, Vila Antiga, tersa ne’e.
Padre Alípio Gusmão, argumenta edukasaun tempu ohin kompara ho edukasaun tempu uluk laiha diferensa tanba asesu ba edukasaun ne’ebé kualidade bazea ba tempu tuir ema-nia moris.
Diretór Servisu Munisipál Edukasaun Baucau, Augosto Ornai Ximenes, agradese ba administradór diosezanu dioseze Baucau tanba bele prezide misa abertura letivu tinan letivu 2023 iha munisípiu Baucau.
“Komunidade edukativa postu administrativu Baucau Vila inklui estudante sira partisipa ativu nu’udar parte atu agradese tinan eskola 2023 no husu bensaun ba ita-nia atividade ne’ebé sei lao iha tinan-ne’e bele hetan grasa no kbiit atu hal’ao serbisu iha munisípiu Baucau,” Augosto Ximenes hateten.
Hola parte iha misa abertura ensinu aprenijazen tinan-2023 komposta hosi diretór servisu edukasaun munisípiu Baucau, Augosto Ornai Ximenes, funsionáriu, diretór eskola nível ensinu báziku to’o sekundária, profesór no estudante sira iha postu administrativu Baucau Vila.
Jornalista : Natalino Belo
Editór : Evaristo Soares Martins
