DILI, 17 janeiru 2023 (TATOLI)–Ministru Edukasaun Juventude no Desportu (MEJD), Armindo Maia, informa estudante désimu segundu anu na’in 10 hosi eskola ensinu sekundáriu jerál 5 de Maio Becora ne’ebé Ministériu Edukasaun identifika halo falsifika dokumentu iha anu letivu 2022 submete ona ba Ministériu Públiku (MP).
Tanba, nia hatutan, estudante na’in-10 ne’e envolve iha prosesu krime falsifikasaun dokumentu entaun sira tenke submete ba prosesu judisiária, maibé Ministériu mós la taka matan fó nafatin oportunidade ba sira na’in-10 ne’e hodi tuir ezame nasionál iha tinan kotuk.
“Ita konsidera ona katak estudante na’in-10 ne’e komete ona iha krime falsifikasaun dokumentu maibé ita sei nafatin fó oportunidade ba sira hodi tuir ezame nasionál. Agora sira-nia prosesu iha ona justisa nia liman, ita hamutuk hein de’it ninia desizaun,” Ministru Edukasaun ne’e hateten ba jornalista sira iha eskola Ensinu Sekundáriu Jerál (ESG) 4 Setembru Balide.
Diretór Servisu Edukasaun Munisípiu Dili (DSEMD), Carlito Soares, informa katak diploma estudante na’in-10 nian to’o agora seidauk devolve ba estudante sira tanba sira nia kazu seidauk ramata, bainhira loos hotu ona mak Ministériu sei entrega ba sira ida-idak.
“Ita-nia estudante na’in-10 ne’e sira-nia diploma trava kedan iha nasionál hodi hein prosesu tuir dalan justisa. Kuandu loos ona mak Ministériu entrega fila-fali sira-nia diploma,” Carlito ba ADência Tatoli iha ninia servisu fatin, Comoro,
Tanba, ministériu Edukasaun haree aktu sira-ne’e konsidera nu’udar krime ida entaun estudante sira ne’e tenke submete ba Ministériu Públiku tuir dalan justisa atu bele hatuur sasán sira tuir nia dalan. kuandu kazu ne’e hotu ona Ministériu sei devolve fali sira-nia diploma.
Agora daudaun, estudante sira-ne’e tenke kumpre ona oráriu justisa nian hodi hatán notifikasaun ruma hosi parte justisa, tanba kazu estudante na’in-10 nian ne’e entrega hotu ona ba Ministériu Públiku atu halo prosesu tuir dalan justisa.
Ne’eduni, tuir nia, estudante na’in-10 ne’e mak sei hasoru prosesu hotu atu hatán aktu ne’ebé sira komete.
Entretantu, estudante na’in-10 ne’e hetan identifikasaun iha tinan kotuk hosi Dirasaun Nasionál Edukasaun Munisípiu Dili relasiona ho sira-nia diploma orijinál bainhira eskola hotu halo preparasaun ba dadus estudante sira-ne’ebé atu tuir ezame nasionál.
Sira na’in-10 ne’e iha tinan hirak liubá kotuk la liu hosi nivél ensinu báziku, maibé tanba iha ema balun bele falsifika dokumentu, entaun sira hetan diploma ensinu báziku terseiru siklu asesu ba nivel ensinu sekundáriu iha eskola 5 de maiu Becora hahú hosi désimu to’o désimu segundu anu maka foin hetan identifika hosi edukasaun.
Jornalista : Tomé Amado
Editór : Cancio Ximenes
