Juíz Benjamin hetan suspensaun tanba komete infrasaun disiplinár

DILI, 12 janeiru 2023 (TATOLI) – Konsellu Majistratura Judisiáriu (KSMJ) deside hodi aplika pena suspensaun ba Juíz Benjamin Barros tanba ba komete infrasaun disiplinár bainhira hala´o funsaun hanesan Juíz.
“Sim, iha duni Juíz ida mak hetan suspesaun hanesan ita bo’ot sira rona. Suspensaun ne’e desizaun la´os mai hosi Tribunál Rekursu maibé mai hosi desizaun Konsellu Superiór Majistratura Judisiáriu. Suspensaun ne´e akontese tanba motivu barak tebes”, Prezidente Tribunál Rekursu, Deolindo dos Santos hateten jornalista sira iha Tribunal Rekursu, Caicoli, kuarta ne’e.
Nia afirma suspensaun ne’e mosu normál tanba dalabarak juíz sira halo infrasaun ba nia servisu, nune’e mak konsellu deside hodi aplika pena suspensaun tuir gravidade no faktu ne’ebé juíz sira komete.
“Ha’u labele koalia nia motivu sira maibé klaru motivu ba suspensaun ne’e la ses hosi servisu Juíz sira nian loroloron, hanesan iha desizaun ne’ebé ke atraza no iha buat balun ne’ebé ke ita bo’ot sira hatene, julgamentu sem justifikasaun, Juíz sira la tama servisu, ida ne’e maka sai razaun atu aplika pena ba Juíz no ba kazu ida ne’e rasik Juíz ida hetan hetan suspensaun tanba komete duni hanesan ne’e”, dehann nia.
Prezidente Tribunál Rekursu haktuir durante ne’e Tribunál Rekursu kontrata Juíz Internasionál balun nudar inspetór hodi fó inspensaun ba servisu Juíz nian.
“Agora daudaun, ita seidauk iha kondisaun atu iha inspetór timoroan ida, entaun lei mós permite atu ita halo rekrutamentu ba Juíz Internasional ho nivél ne’ebé ke bo’ot atu mai halo inspensaun ba juíz sira no ida ne’e mak ita lao daudauk, maibé la taka dala iha futuru karik ita iha ita nian inspetór rasik”, afirma nia.
Deolindo dehan inspetór Internasionál ne’ebé fó inspesaun servisu nasionál Juíz sira nia só ajuda KSMJ nian servisu liuliu iha materia inspesaun no halo averiguasaun ba servisu Juíz sira kuandu hetan infrasaun ruma ne’ebé liga ba servisu Juíz nian.
“Inspetór internasionál bazea ba nia relatóriu sira ne’e mak foin rekomenda ba Konsellu Superór Majistratura Judiaria no kosellu mak sei haree hodi deside no aplika pena suspensaun disiplinar, tanba inspetór internasionál laiha kompeténsia atu deside”, Deolindo afirma.
Jornál Repúblika ne’ebé maka jornalista Agência TATOLI asesu ho númeru despaixu 175 do EMJ. Ne’ebé publika iha sesta loron 30 setembru 2022, deskreve katak Konsellu Superiór Majistratura Judisiáriu deside hodi suspende Juíz ho naran Dr. Benjamin Barros tanba komete infrasaun disiplinár bainhira hala´o funsaun hanesan Juíz.
Jornalista: Natalino Costa
Editór : Zezito Silva

