DILI, 18 janeiru 2023 (TATOLI)–Ministru Administrasaun Estatál (MAE), Miguel Pereira de Carvalho, apela ba komunidade iha kapitál Dili atu soe foer tuir oráriu ne’ebé Governu termina mak hahú hosi tuku 05h00-07h00 dadeersan tanba liu oras ida-ne’e pesoál saneamentu sira labele raut ona.
Notísia Relevante: Governu aumenta tan kamioneta 20 rekolla lixu iha kapitál Dili
“Ha’u apela ba komunidade hotu-hotu iha kapitál Dili soe foer iha dadeersan hahú tuku 05h00-07h00, tanba liu oras ida-ne’e ita haree foer fila-fali ona. Tan ne’e husu bainhira liu ona oras soe foer nian mak atu di’akliu rai iha uma no iha dadeer tuir mai mak soe foer,” Governante ne’e hateten ba jornalista sira, iha Palásiu Governu, kuarta ne’e.
Tanba ne’e, nia dehan, presiza komunidade nia konxiénsia atu soe foer tanba iha kapitál Dili ne’e, kada loron komunidade produs foer tonelada 230 tanba de’it populasaun iha Dili ne’e aumenta ba beibeik.
“Ita-nia kamioneta besik 80 ne’e kobre ka foti foer ba lixeira Tibar ne’e dala tolu kada kamioneta ida kada loron. Entaun, ita dehan loron ida kamioneta 240 mak tula foer sai hosi Dili ba fakar iha lixeira Tibar-Liquiça,” nia esplika.
Entretantu, Governu daudaun ne’e kontratu kompañia raut lixu iha sidade Dili ne’e hamutuk empreza lima (5) mak komapañia GSA, Nelces, Felipra, Jacrilo no Labilay.
Dekretu-lei númeru 33/2008 kona-ba “ljiene no Órden Públika ” to’o agora seidauk aplika no iha artigu 9 ko’ali kona-ba koima maibé to’o agora seidauk bele implementa, tanba sei presiza tan artigu balun hodi reforsa no parte autoridade munisípiu Dili bele implementa.
Jornalista : Osoria Marques
Editór : Cancio Ximenes
