MOP kontinua halo peskiza ba estrada aat sira iha Kapital Dili
DILI, 18 janeiru 2023 (TATOLI)— Ministru Obra Públika (MOP), Abel Pires, hateten ekipa tékniku husi Ministeriu kontinua halo peskiza hodi foti dadus ba estrada aat no kuak-sira iha kapitál Dili laran.
“Relasiona estrada aat sira iha kapital Dili, ha’u husu fó tempu fulan ida ka rua ba ami, hodi ami-nia ekipa halo peskiza iha terrenu rekolla dadus para bele halo reabilitasaun,” Abel Pires hateten ba Tatoli, iha Palásiu Governu, Dili, kuarta ne’e.
Nia dehan, bainhira ekipa remata peskiza iha terrenu, MOP sei haree ida ne’ebé kmaan sei halo dezeñu rasik para halo reabilitasaun no ida ne’ebé kategori todan, sei lori ba konkursu públiku.
“Tanba estrada sira iha kapitál Dili, antes ne’e, balu dezeñu la’o hela mak hanesan, iha Becusse, Cristo-Rei, Bairro-Pite no seluk tan. Rezultadu dezeñu ita sei hein, maibé ha’u atu dehan katak prosesu reabilitasaun ne’e sei han tempu oituan,” nia dehan.
Nia dehan tan, estrada parte Bebonuk, no Ai-tarak-Laran, MOP seidauk bele book tanba iha komunidade balu iha área refere la koopera.
“Parte Bebonuk seidauk bele hadi’a tanba komunidade la koopera atu muda ba sorin, ne’ebé sei hadi’a uluk bee-dalan mak foin atu halo reabilitasaun ba estrada,” nia deklara.
Nia mos husu ba lideransa komunitáriu atu ajuda Governu konvense ho komunidade nune’e bele iha rezultadu hodi halo reabilitasaun ba Estrada refere.
Jornalista : Arminda Fonseca
Editora : Armandina Moniz
