DILI, 18 janeiru 2023 (TATOLI) – Prokuradór Domingos Barreto hetan ameasa hosi sidadaun ida ho isiál (A), nudar funsionáriu iha Ministériu Edukasaun, bainhira sidadaun ne’e akompaña nia kolega ba presta deklarasaun iha edifísiu Ministériu Públiku, Colmera.
Kazu ne’e akontese iha tuku 9:00 loron tersa (10/1) bainhira prokuradór ne’e fó hela dilijénsia ba arguidu ida ba kazu disputa rai iha Suku Hera, Postu Administrativu Cristo Reis, Munisípiu Dili.
Motivu hosi kazu ne’e maka bainhira Prokuradór Domingos Barreto halo hela investigasaun ba arguidu kazu disputa rai iha Hera ne’e tanba nia maka nudar titulár ba kazu disputa refere.
Bainhira nia halo tiha identifikasaun ka dilijénsia ba uluk lezada sira hodi rona sira nia deklasaun iha momentu ne’ebá nia mós halo investigasaun hodi rona deklasaun hosi arguidu sira ba kazu ne’e.
“Momentu ne’ebá ha’u halo hela dilijénsia ba lezadu sira uluk hafoin ida ne’e ha’u mós kontinua halo dilijénsia ba arguidu sira atu rona arguidu sira nia deklasaun ba kazu disputa rai iha Hera. Entaun momentu ne’e arguidu tama ba ha’u nia sala laran no arguidu hetan akompanamentu hosi nia kolega ho insiál A, nune’e ha’u dehan ba arguidu nia kolega, ita bele sai tanba ha’u presiza arguidu atu halo dilijénsia ba nia, maibé arguidu nia kolega ne’e lakohi sai hakarak akompaña arguidu durante prosesu presta dekasaun”, Prokuradór Domingos Barreto, hateten ba jornalista sira iha Tribunál Distritál Dili (TDD), kuarta ne’e.
Nia konta sidadaun insiál A lakohi husik fatin no taka tiha odamatan Prokuradór Domingos no ameasa nia ho liafuan oioin to’o hasai liafuan ofisiál ba prokuradór sira ne’e katak prokuradór servisu la hatene.
Ho nune’e, Prokuradór Domingos tenta atu hakalma, maibé labele no haree ba situasaun ne’e Prokuradór Domingos sai hosi nia sala laran, tanba sente nia vida ameasadu.
Iha momentu ne’e kedan, prokuradór informa kedan asaun ne’ebé halo hosi sidadaun ho inisiál A ba polísia no hetan kedan atuasaun hosi autoridade seguransa.
Domingo Barreito halo kedan prosesu kontra sidadaun ne’e hodi fó autorizasaun ba polísia atu detein kedan sidadaun ne’e iha sela detensaun ho oras 72.
“Momentu ne’e ita promove Ministériu Públiku, promove kedan sidadaun ne’e ho krime koasaun ba majistradu”, afirma nia.
Iha kinta (12/1) sidadaun ne’e submete ba interogatóriu dahuluk iha Tribunál Distritál Dili (TDD).
TDD aplika medida koasaun aprezentasaun periódika (AP) ba sidadaun ho inisiál (A) hodi aprezenta aan ba polísia semana ida dala-rua.
Prokuradór haree ba situasaun sira ne’e hanesan prokurdór hato’o ona karta ba Konsellu Superiór Majistratura Ministériu Públiku koloka polísia mai iha edifísiu Ministériu Públiku nian, atu nune’e karik prokuradór sira ba futuru halo dilijénsia ba lezadu ka arguidu mosu tán problema sira hanesan bele halo atuasaun.
“Ha’u agora sente sei ha’u nia vida sei sente ameasadu tanba ne’e hanesan prokurdór hato’o ona karta ba Konsellu Superior Majistratura Ministériu Públiku atu koloka polísia mai iha edifisiu Ministériu Públiku bele asegura servisu prokuradór bainhira halo dilijénsia mosu dezentendimentu nune’e bele halo atuasaun,” dehan Nia.
Jornalista: Natalino Costa
Editór : Zezito Silva
