SEAK sei disemina lei kódigu direiru autór iha territóriu nasionál

DILI, 18 janeiru 2023 (TATOLI)–Diretór Jerál Arte no Kultura, Manuel Ximenes Smith, hateten SEAK sei halo diseminasaun ba Lei Kódigu Direitu Autór no Direitu Koneksus ba komunidade iha terrotóriu nasionál atu komunidade bele hatane sansaun no koima ba ema sira-ne’ebé mak la konsidera ka falsifika ema seluk ninia obra.

Notísia Relevante: PN aprova projetu-lei Kódigu Direitu Autór iha finál globál

Nia hatutan, hafoin Prezidente Repúblika (PR) José Ramos Horta halo promulgasaun ba Lei Kódigu Direitu Autór ne’e, Governu hetan kompeténsia tomak iha loron 180 hodi hala’o preparasaun kona-ba prosesu diseminasaun lei ne’e ba komunidade sira iha territóriu nasionál.

Diseminasaun lei rua ne’e kompeténsia tomak entrega ba Komisaun A no Komisaun G maibé sei hetan apoiu hosi Unidade Jurídika hosi Ministériu Ensinu Superiór nian hodi halo sensibilizasaun ba komunidade tomak kona-ba direitu obra ne’ebé sira rasik prodús atu labele hetan falsifikasaun ka copy-paste ema seluk nia obra.

“Ha’u hakarak dehan lei kódigu direitu autór no Direitu Koneksus ne’e rasik hateten ona bainhira prosesu diseminasaun ne’e kuandu ramata ona ezije komunidade bainhira atu uza ema seluk nia obra ka kanta ema seluk nia múzika tenke halo kontratu no karta aseitasaun ruma. Maibé, kuandu la kumpre kontinua uza ema seluk nia obra laiha responsabilidade sei prega sansaun no selu koima. Sansaun ne’e bele kastigu loron 250 no selu koima hosi $1.000 to’o $5.000,” Diretór Jerál Arte no Kultura ne’e hateten ba Agência Tatoli iha edifísiu MESSK, Colmera, kuarta ne’e.

Tuir kalendáriu, atividade diseminasuan ba lei rua ne’e tuir kalendáriu ne’ebé deside ona sei realiza iha munisípiu Bobonaro iha loron 19 janeiru 2023, maibé tanba diskusaun lei orsamentu ministériu nian seidauk hetan promulgasaun hosi Prezidente Repúblika, entaun ne’e atividade diseminasaun lei rua ne’e sei adia hela.

“Ita deside ona data atu halo diseminasaun ba lei rua ne’e hahú iha loron 19 janeiru 2023, maibé orsamentu seidauk la’o entaun ita tahan lai. ita seidauk bele deside fila-fali data alternativu tuir mai tanba diskusaun lei orsamentu seidauk hetan promulgasaun hosi Prezidente Repúblika,” nia dehan.

Maibé, tuir nia, Ministériu Ensinu Superior Siénsia no Kultura rasik agora daudaun prevee ona fundu rihun $10 inklui mós fundu hosi Ministériu Turizmu Komérsiu Indústria nian hamutuk rihun $10, maibé sei iha ezersísiu nafatin tanba proposta ne’ebé mai hosi MESSK rasik prevee ona rihun $80 tanba atividade ne’e rasik sei abranje ba munisípiu tomak.

Nune’e, atividade desaminasaun ne’e rasik termina ona oradór sira hosi Prezidente Komisaun G Prezidente Komisaun A tanba kontribuisaun makaas komisaun rua ne’e nian hahú prosesu iha jeneralidade mai to’o iha espesialidade ikus liu taka iha finál globál.

Tanba ne’e, nia dehan, presiza komisaun rua ninia esplikasaun iha komunidade atu ema hotu bele intende hodi nune’e ba futuru labele akontese falsifikasaun sira.

Jornalista : Tomé Amado

Editór        : Cancio Ximenes