OÉ-CUSSE, 18 janeiru 2023 (TATOLI) – Komandante Autoridade Protesaun Sivíl iha Rejiaun Administrativa Espesiál Oé-Cusse Ambeno (RAEOA), Herman Metan, informa, daudaun ne’e, Komisaun Jestaun Risku Dezastre (KJRD) apoia ona nesesidade bázika ba vítima dezastre naturál hamutuk 66 iha territóriu Oé-Cusse.
Komandante Autoridade Protesaun Sivíl ne’e informa, KJRD ne’e komposta hosi, Sekretária Rejionál ba Asuntu Edukasaun no Solidariedade Sosiál (SRESS), Autoridade Protesaun Sivíl, hamutuk ho parseiru dezenvolvimentu Cruz Vermelha Timor-Leste Fialiál Oé-cusse (CVTL).
“Iha segunda liubá ita atualiza ona dadus kona-bá progresu servisu ba Autoridade RAEOA no planu atividade protesaun sivíl durante ne’e ita oferese apoiu ajudu ba ita-nia komunidade sira-ne’ebé hetan dezastre,” Herman Metan ko’alia iha Oé-Cusse, kuarta ne’e.
Nia hatutan, dezastre naturál ne’e akontese iha loron 30 dezembru 2022 rezulta uma-kain 62, balu iha Oésilo, Pante Makasar no Nítibe, tanba udan-boot hetan estragu ba uma hela fatin, rai halai uma nakfera no no natar toos hetan estragu.
“Entaun ita serbisu hamutuk ho parseria sira identifika vítima sira-nia kondisaun hodi hetan hetan apoiu emerjénsia, tanba tipu inundasaun ne’ebé komunidade sira enfrenta, tanba mota estrada uma hela fatin, estraga mós to’os ho natar, ida-ne’e maka merese atu simu apoiu hodi hakman sira hosi situasaun ne’e,” nia katak.
Entretantu, apoiu umanitária ho tipu food item mak hanesan, foos saka ida, supermie, mina goreng, ikan-lata, susubeen no hahán seluk tan, nune’e non-food item komposta hosi ekipamentu dapur nian, roupa, lona, no seluk tán.
Jornalista : Abílio Elo Nini
Editór : Evaristo Soares Martins
