DILI, 19 janeiru 2023 (TATOLI)— Ekipa konjuntu inspesaun ne’ebé lidera hosi Autoridade Inspesaun no Fiskalizasaun Atividade Ekonómika Sanitária no Alimentár, Institutu Públiku (AIFAESA,I.P) kontinua halo selajen (segel) ba produtu masin-midar hamutuk saku 14.117 iha armajen Alfa Dili.
Sup Inspetór Jerál AIFAESA,I.P, Dionisio Neto da Silva, hateten, ekipa ne’ebé halo selajen ba produtu masin-midar, refere hosi ekipa konjuta intervensaun merkadu ne’ebé lidera hosi AIFAESA,I.P hamutuk Ministériu Turizmu, Komérsiu no Indústria (MTKI), liuhosi Diresaun Regulasaun Komersiál no Protesaun Konsumidór, Autoridade Aduaneiru (Alfándega), no Polísia Nasionál Servisu Investigasaun Kriminál (PNSIK).
“Razaun ekipa konjunta halo selajen ba produtu masin-midar iha Loja Alfa Dili, tanba konsidera hanesan pratika asambarkamentu ka rai subar produtu ne’ebé importa iha tinan 2022 nian hamutuk saku 14.117,” Dionísio Neto da Silva dehan ba Agência Tatoli, via telefónika, kinta ne’e.
Nia dehan, sira halo selajen ba produtu masin-midar ne’e tanba bazeia ba dekretu lei númeru 29/2011 20 juñu kona-ba presu justu, hateten marjen komersializasaun bele hetan lukru maibé labele liu hosi 10% to’o 15%, nune’e liga mós ba lei númeru 4/2011 1 juñu kona-ba krime asambarkamentu no espekulasaun bandu produtu ne’ebé stok tuan, no labale faan fali iha situasaun hanesan agora ne’e.
“Ita halo selajen hodi hein konfirmasaun kona-bá presu hosi produtu ne’e rasik,” nia dehan.
Aleinde, ekipa konjunta halo intervensaun ba loja Alfa Dili, ekipa inspesaun konjunta ne’e halo mós verifikasaun ba presu hosi produtu sira hanesan masin-midar, Coca-cola no produtu seluk iha loza sira seluk iha Dili laran.
Jornalista : Arminda Fonseca
Editora : Armandina Moniz
