DILI, 18 janeiru 2023 (TATOLI) – Sekretáriu Estadu Juventude no Desportu (SEJD), Abrão Saldaha, dehan Japaun komprometidu hakarak apoiu Timor-Leste nia dezenvolvimentu iha área desportu, atu nune’e bele mellora liután talentu juventude sira-nian.
“Ohin ha’u ho embaxadór Japaun nian iha Timor-Leste koalia kona-ba dezenvolvimentu desportu no Japaun hakarak mellora desportu hanesan forma diplomasia Timor-Leste ho Japaun, ami diskute klean oinsa sira nia esperiénsia ne’ebé klean atu fahe ho ita hanesan edukasaun fízika no seluk tan”, Abrão hateten ba jornalista sira iha edifisiu SEJD, Lecidere, ohin.
Tanba ne’e, iha fulan marsu agora Japaun sei haruka uluk voluntáriu na’in-hitu atu koloka ba eskola sira iha Dili laran no munispiu balun hosi ensinu báziku to’o ensinu superiór, oinsa bele promove atividade edukasaun fízika.
“Ami esplora mós esperiénsia sira nian oituan kona-ba desportu no kombate liuliu iha arte marsiál, ita hotu hatene iha 1920 ba kotuk Japaun deskontroladu tebes ba arte marsiál, maibé to’o ikus sira konsege jere ho di’ak no ikus promove sai hanesan jogu Olympic, entaun sira esplika sira nia esperiénsia sira ne’e, entaun sai ezemplu ida mai ita atu implementa hodi jere ita nia arte marsiál sira, oinsa forma arte marsiál atu moris hanesan modalidade desportiva laos oho malu”, revela nia.
Ho nune’e, Japaun interesante tebes atu apoiu másimu ba modalidade arte marsiál Japaun nian iha Timor-Leste hanesan Karate-do, Kempo no seluk tan oinsa atu hakbesik ba federasaun sira ne’ebé eziste iha nasaun ne’e, nune’e bele mellora liután atleta sira bele sai hanesan atleta profesionál.
Embaxadór Japaun iha Timor-Leste, Tetsuya Kimura, hasoru malu ho SEJD atu fahe esperiénsia kona-ba oinsa atu dezenvolve modalidade desportu iha Timor-Leste no edukasaun fízika ba joven sira.
“Hasoru malu ho sekretáriu estadu ne’e atu koalia kona-ba dezenvolvimentu desportu, ha’u fahe mós ha’u nia esperiénsia kona-ba iha tinan 2015-2017 hanesan diretór desportu iha Japaun, buat importante ne’ebé ha’u fahe mak lalaok desportu nia papel atu halo ema respeita malu liután banihira pratika desportu” embaxadór hateten.
Nia friza Japaun iha vontade bo’ot apoiu desportu iha Timor-Leste liuhosi fahe esperiénsia atu jere arte marsiál sira ba modalidade desportu loloos la´os atu oho malu.
“Ami iha vontade makas atu apoiu Timor-Leste dezenvolve modalidade desportu, ami sei fahe esperiénsia ami nian kona-ba oinsa jere desportu ho di’ak hodi fó benefisiu ba ema hotu nia saúde” hakotu nia.
Jornalista:Hortencio Sanchez
Editór : Zezito Silva
