DILI, 19 janeiru 2023 (TATOLI)–Konstrusaun eskola lima iha munisípiu Aileu ne’ebé tama iha projetu komunitária no projetu kapitál dezenvolvimentu sei finaliza ninia prosesu reabilitasaun no konstrusaun fíziku iha tempu besik tanba atinje ona 57% ba leten.
Diretór Servisu Edukasaun Munisípiu Aileu (DSEMA), Carlito Pereira, relata eskola lima ne’ebé sei konklui ninia prosesu reabilitasaun no konstrusaun fíziku ne’e kompostu hosi eskola edukasaun Pre-Eskolár ida, ensinu báziku tolu no ensinu sekundáriu tékniku vokasionál ida.
“Ita iha ona eskola lima mak sei konklui iha tempu besik, eskola haat ne’e mai hosi projetu komunitária no eskola ida mak hosi kapitál dezenvolvimentu,” Carlito Pereira hateten ba Agência Tatoli liuhosi telefónika, kinta ne’e.
Nia esplika, eskola haat mai hosi projetu komunitária ne’e mak Eskola ensinu báziku Filiál (EBF) Teblor, EBF Laklo, EBF Seloi Koto Bauru no Edukasaun Pre-Eskolár (EPE) Mantane no hosi fali projetu kapitál dezenvolvimentu nian ne’ebé liu hosi konkursu públiku mak eskola ensinu sekundáriu tékniku vokasionál ida.
Tuir nia, totál projetu komunitária ne’ebé Aileu hetan hamutuk 13, projetu haat mak tama ona faze final sei falta projetu komunitária sia (9) mak sei iha hela prosesu nia laran, no hosi projetu haat ne’e kuaze hotu-hotu atinje ona 57% ba leten.
Entretantu eskola lima iha faze final ne’e prepara ba lansamentu inaugurasaun segunda faze, depois inaugurasaun primeira faze ramata iha munisípiu Baucau no agora daudaun parte Dirasaun Servisu Edukasaun Aileu deside ona inaugurasaun ba segunda faze iha Aileu sei realiza iha eskola Ensinu Báziku Filiál Manukasa, Lekidoe, Aileu.
“Ha’u hakarak dehan inaugurasaun eskola 92 faze dahuluk ne’ebé sei lansa hosi Primeiru-Ministru iha loron 27 janeiru 2023 iha Baucau. Maibé ami la tama, ami-nian sei hein fali ba segunda faze tuir mai iha munisípiu Aileu,” nia hateten.
Jornalista : Tomé Amado
Editór : Cancio Ximenes
