iklan

JUSTISA, HEADLINE

MP deside devolve osan rihun $130 ba KHUNTO

MP deside devolve osan rihun $130 ba KHUNTO

Osan dolar Amérika. Imajen/Espesiál

DILI, 19 janeiru 2023 (TATOLI) – Advogadu Privadu Partidu Kmanek Haburas Unidade Nasionál Timor Oan (KHUNTO), Isamail Lopes, hateten Ministériu Públiku liuhosi Prokuradór Titulár hatun despaixu ba Banku Sentrál Timor-Leste (BCTL) hodi autoriza devolve osan rihun $130 hosi partidu KHUNTO, ne´ebé mak antes ne’e parte autoridade seguransa no Autoridade Aduaneira (AA)/Alfándega halo apreensaun iha Aero Portu Internasionál Nicolau Lobato Comoro iha tinan kotuk tanba la priénse rekezitu ba krime brankeamentu kapitál.

Nia dehan hafoin MP rona tiha parte hirak ne’ebé sai hanesan interveniente ba prosesu liuliu ba ema hirak ne’ebé sai hanesan suspeitu ba kazu lori osan ho montante rihun $130.

Tuir nia MP nudar nain ba asaun penál tuir lei Kodigu Penál 49, nia maka bele halo promosaun no halo akuzasaun.

Nune’e MP hafoin valida tiha prosesu osan rihun $130 no rona tiha suspeitu ne’ebé lori osan ne’e nian deklasaun.

“Ministériu Públiku haree no entende katak ba prosesu osan $130.000 ne’e la priénse rekezitu ba krime brankamentu kapitál”, Advogadu Privadu, Isamail Lopes, hateten ba journalista sira liuhosi Konferénsia Imprensa ne’ebé hala´o iha Hotel Timor, kinta ne’e.

Nia rekorda osan ne’e partidu KHUNTO nian atu hasai iha banku hodi lori ba hola atributu partidu nian hodi prepara ba atividade partidu nian iha 2023.

Maibé osan refere konsidera osan ne’ebé ema nain-rua ne’e la hetan koñesimentu hosi Banku Sentrál Timor-Leste (BCTL) no viola lei brankamentu kapitál. Tanba lori osan ho montante bo’ot la informa ba Banku Sentrál Timor-Leste.

“Ministériu Públiku nudar nain ba asaun penál hafoin valida tiha prosesu osan 130.000, nune’e Ministériu Públiku haree no entende katak ba prosesu osan ne’e la priénse rekezitu ba krime brankamentu kapitál”, Isamail Lopes afirma.

Nia hatutan tuir MP nia haree laiha tán faktu sufisienste ruma atu asegura tán osan ne’e tanba ne’e maka Prokuradór Titulár hatún despaixu ba BCTL hodi autoriza devolve osan ne’e ba nia nain tanba la priénse rekezitu ba krime brankeamentu kapitál.

Nune’e, iha kuarta (18/1) tuku 14h:00 loraik MP notifika Advogadu Privadu Partidu KHUNTO Isamael Lopes hodi aprezenta faktu hosi MP ba BCTL atu devolve osan rihun $130 tanba la priénse krime brankeamentu kapitál no somente viola de’it regra administrativa hosi lei númeru 11/2017 importasaun no exportasaun.

Tanba ne’e mak autoriedade BCTL devolve fali osan rihun $130 no selu de’it koima  ho montante $5.000 tuir lei númeru 11/2017 importasaun no exportasaun haruka, tanba viola regra administrativa.

Nia rekorda katak Aatoridade Polisiál PCIC, SNI no Autoridade Aduaneira (AA)/Alfándega iha loron 10/10/2022 halo apreensaun ba osan ho montante rihun $130 iha Aero Portu Internasionál Nicolau Lobato Comoro hosi ema nain-rua ne’ebé mak partidu KHUNTO atu ba rai li’ur hodi hola sasan atributu partidu nia preparativu ba atividade eleitórál 2023.

Jornalista: Natalino Costa

Editór : Zezito Silva

iklan
iklan

Leave a Reply

iklan
error: Content is protected !!