Xanana agradese Japaun mantein apoiu dezenvolvimentu TL
DILI, 19 janeiru 2023 (TATOLI) – Eis-Primeiru-Ministru, Kay Rala Xanana Gusmão, agradese ba povu no Estadu Japaun ne’ebé kontinua fó apoiu ba Timor-Leste iha área oioin, hanesan agrikultura, infraestrutura, edukasaun, saúde no seluk tan.
Lider karísmatiku Xanana konsidera Japaun nu’udar doadór bo’ot ida ne’ebé fó apoiu makas ba dezenvolvimentu Timor-Leste nian, dezde ukun-aan.
“Ha’u ho embaixadór Japaun, ami rua diskute kona-ba área importante sira ne’ebé sira fó, ita hein loron ruma karik presiza sei ko’alia di’ak liutan iha área hotuhotu ne’ebé Japaun oferese no sei oferese nafatin ba ita”, Xanana dehan iha edifisiu Sede CNRT, Bairru dos Grilhos, ohin.
ho Embaixador Japaun ba Timor-Leste, Tetsuya Kimura
Xanana orgullu, tanba Embaixadór Japaun, Tetsuya Kimura antes ne´e hala’o ona servisu iha Timor-Leste no nia koñese di’ak situasaun polítika, ekonomia no povu nia moris.
Iha fatin hanesan, Embaixador Japaun ba Timor-Leste, Tetsuya Kimura agradese bele hasoru lider istóriku, Xanana hodi informa ninia knaar foun hodi reprezenta povu no Estadu Japaun hodi koopera ho Estadu Timor-Leste.
“Ha’u agradese tebes tanba bele hasoru malu ho lider Xanana hodi koalia kona-ba dezenvolvimentu ne’ebé la´o hela”, embaxadór dehan.
Nia dehan Japaun mantein apoiu Timor-Leste iha área oioin atu tulun dezenvolvimentu nasaun ne’e nian tanba Timor-Leste ho Japaun hanesan ona amigu di’ak.
Embaixadór Japaun entrega ona karta kredensiál ba Prezidente Repúblika, José Ramos-Horta iha 05 dezembru 2022 hodi hahú nia servisu iha Timor-Leste.
Jornalista: Hortencio Sanchez
Editór : Zezito Silva
