iklan

NASIONÁL, EDUKASAUN, DILI, HEADLINE

Eskola Sekundária Jerál Hera presiza tan profesór 12

Eskola Sekundária Jerál Hera presiza tan profesór 12

Eskola Ensinu Sekundáriu Tékniku Vokasionál (ESTV)-Eskola Ekonomia no Komérsiu Becora (EEC-sigla portugés). Foto espesiál

DILI, 20 janeiru 2023 (TATOLI)–Eskola Ensinu Sekundáriu Tékniku Vokasionál (TEKVOK) Hera ne’ebé transforma ona ba Ensinu Sekundáriu Jerál (ESG, sigla portugés) ne’e, presiza tan profesór hamutuk 12 atu reforsa prosesu ensinu aprendizajen iha departamentu Siénsia Tékniku (CT) no Siénsia Sosiál Umana (CSH).

Diretór Eskola Ensinu Sekundáriu Jerál Hera, Antonio Pinto, relata Eskola Ensinu Sekundáriu Tékniku Vokasionál (ESTV) Hera depois transforma ona ba Eskola Ensinu Sekundáriu Jerál (ESG) ne’e, hasoru difikuldade boot ida mak professor, tanba agora seidauk iha kolokasaun profesór iha eskola refere tuir nesesidade iha departamentu CT no CSH nian.

“Iha ami0nia eskola presiza tan profesór hamutuk 12, atu nune’e bele responde ba departamentu rua ne’ebé eziste tanba agora ami la’ós ona eskola TEKVOK maibé ESG ona. Ne’eduni kolokasaun profesór sira tenke tuir duni departamentu ne’ebé eziste iha ami-nia eskola,” António Pinto hatten ba Agência Tatoli liuhosi telefónika, sesta ne’e

Hosi departamentu ezata ka siénsia tékniku de’it, sira presiza profesór hamutuk neen (6) atu nune’e bele koloka iha matéria dixiplina hanesan Kímika, Fízika no Biolojia.

Iha fali departamentu Siénsia Sosiál nian presiza tan profesór na’in-hitu (7) atu bele responde matéria dixiplina hanesan Istória, Jeografia no Sosiolojia, atu nune’e bele hatan ba nesesidade ne’ebé eskola presiza

“Ha’u husu ona ba Ministériu Edukasaun bainhira transforma ona eskola TEKVOK Hera ba ESG ne’e mínimu tenke prepara ona rekursu atu bele koloka mai eskola ne’e. Maibé ami seidauk simu resposta ida hosi sira,” nia dehan.

Ministru Edukasaun Juventude no Desportu (MEJD), Armindo Maia, konsidera sira sei atende duni preokupasaun eskola TEKVOK sira-ne’ebé transforma ona ba ESG ne’e liu-liu buka atu aumenta tan profesór ba iha eskola sira0ne’e, atu bele responde prosesu ensinu aprendizajen ida di’akliu ba estudante sira.

“Ha’u hatene ona sira-nia preokupasaun. Ita sei haree asuntu ida-ne’e atu responde duni situasaun iha eskola TEKVOK sira ne’ebé mak transforma ona ba ESG,” nia esplika.

Jornalista : Tomé Amado  

Editór       : Cancio Ximeens 

iklan
iklan

Leave a Reply

iklan
error: Content is protected !!