BAUCAU, 20 janeiru 2023 (TATOLI) – Komandante Polísia Nasionál Timor-Leste (PNTL) Munisípiu Baucau aprezenta difikuldade membru Ofisiál Polísia Suku (OPS) liuhosi hosi reuniaun Konsellu Koordenasaun Munisipál (KKM).
Komandante PNTL munisípiu Baucau, Superintendente António de Sá, esplika, membru Ofisiál Polísia Suku hamutuk na’in-59 ne’ebé hasoru difikuldade hanesan hela-fatin ka rezidensia hodi halo kna’ar iha suku tanba tenke movimentu ba mai.
“Ida-nee mak sai difikuldade, ami serbisu hamutuk ho autoridade lokál hodi buka solusaun liuliu asaun prevensaun kona-ba krime sira-ne’ebé akontese iha komunidade nia leet,” Komandante PNTL munisípiu Baucau hateten iha Vila Nova, sesta ne’e.
PNTL Baucau liuhosi reuniaun avaliasaun entre xefe suku no parseiru dezenvolmentu hanesan Asian Fundation, Uma Paz no Fundasaun Mahein aprezenta kondisaun no difikuldade ne’ebé OPS hasoru liuliu infraestrutura hanesan rezidénsia ne’ebé sai barometru hodi halo serbisu iha baze.
Nune’e Komandu PNTL Baucau hato’o prekupasaun hirak-ne’e ba Autoridade Munisipál Baucau liuhosi reuniaun Konsellu koordenasaun munisipál hodi konsidera nu’udar planu asaun anuál iha orsamentu kada tinan.
“Pelumenus tinan ida halo konstrusaun netik ida ou rua fazeadamente liuhosi planu estratejiku dezenvolvimentu munisipál,” António de Sá akresenta.
PNTL Baucau husu administrasaun Baucau konsidera proposta refere liuhosi orsamentu Programa Nasionál Dezenvolvementu Suku (PNDS) ka parseiru dezenvolmemtu ne’ebé iha interese sai parseiru hodi konstrui rezidénsia ba OPS sira iha baze.
Maske nune’e, PNTL Baucau deside koloka membru OPS sira hosi suku refere nune’e provizoriumente bele iha akomodasaun rasik hodi halo atendimentu ba komunidade.
Jornalista : Natalino Belo
Editór : Evaristo Soares Martins
