iklan

NASIONÁL, EDUKASAUN, DILI, HEADLINE

Profesór “Eskola iha Uma” 76 tuir formasaun refreska durante semana ida

Profesór “Eskola iha Uma” 76 tuir formasaun refreska durante semana ida

Profesór, Pedro Soares Amaral, hanorin labarik sira idade tinan neen no hitu, bainhira implementa programa Eskola iha Uma hosi Ministériu edukasaun joventude no desportu (MEJD), iha Sede Suku Bebonuk, kuarta (24/08). Imajen Tatoli/Francisco Sony.

DILI, 20 janeiru 2023 (TATOLI)–Ministériu Edukasaun Juventude no Desportu (MEJD) fó oportunidade ba profesór hamutuk 76 ne’ebé apoiu programa “Eskola iha Uma” kontinua tuir formasaun refreska durante semana ida.

Notísia Relevante: Labarik 1.074 partisipa ona programa eskola iha uma

Diretór Nasionál Edukasaun Pre-Eskolár, Tomas do Rosário, relata totál profesór sira-ne’ebé Ministériu Edukasaun rekruta hodi apoiu programa Eskola iha Uma hamutuk 176 maibé iha profesór hamutuk 76 mak agora tuir hela formasaun refreska durante semana ida.

“Ita-nia profesór 76 ne’e maske tuir hela formasaun maibé sira kontinua hanorin nafatin. Dadeer sira hanorin lorokraik sira tuir formasaun iha INFORDEPE durante semana ida,” Tomas do Rosario hateten ba Agência Tatoli iha ninia servisu fatin Vila Verde, sesta ne’e.

Formasaun refreska ne’e ho intensaun atu hakle’an tan profesór sira-nia koñesimentu no abilidade durante semana 13 nia laran ho oras 115 ne’e, sira hamutuk ho estudante sira ka labarik sira iha aula laran.

Programa Eskola iha Uma ne’e rasik kuaze rejista ona estudante hamutuk 1.074 hosi sentru ensinu aprendizajen hamutuk 36 iha kapitál Dili.

Maibé, nia dehan, daudaun ne’e iha ona mudansa ba númeru estudante no sentru ne’e rasik tanba estudante lubuk ida mak transferénsia ona ba ensinu báziku.

“Ha’u seidauk fiksa loloos númeru estudante eskola iha uma agora hamutuk hira, tanba kuaze estudante lubuk ida mak simu ona sertifikadu transferénsia ba ensinu báziku tanba sira kompleta ona semana 13 inklui oras 115,” nia dehan.

Enkuantu Dirasaun Edukasaun Pre-Eskolár rasik seidauk iha dadus foun atu klasifika totál estudante hamutuk na’in hira mak sei tuir hela programa eskola iha uma, tanba dadus anteriór nian kontinua mantein hela ho 1.074 estudante, inklui sentru hamutuk 36 ne’ebé rezistradu menus tiha lima no agora hela de’it sentru 31.

Jornalista : Tomé Amado

Editór       : Cancio Ximenes

iklan
iklan

Leave a Reply

iklan
error: Content is protected !!